दीपावली तथा तिहार पर्व सकिएसँगै मिथिलाञ्चलसहित देशभर छठ पर्वको तयारी तीव्र पारिएको छ। पर्वलाई शान्तिपूर्ण र व्यवस्थित रूपमा सम्पन्न गराउन जिल्ला सुरक्षा समिति धनुषाले जिल्लाभर सुरक्षा व्यवस्था कडा बनाएको छ।
बिहीवार जनकपुरधाममा आयोजित जानकारीअनुसार नदी, पोखरी तथा छठ घाटमा शान्ति सुरक्षा कायम गर्न नेपाल प्रहरी र सशस्त्र प्रहरी बललाई संयुक्त रूपमा परिचालन गरिएको छ।
धनुषाका प्रमुख जिल्ला अधिकारी प्रेमप्रसाद लुइँटेलका अनुसार जनकपुरधामका विभिन्न पोखरी, नदी किनार तथा छठ घाटमा सरसफाइ र व्यवस्थापनको काम भइरहेको छ। एकीकृत जिल्ला सुरक्षा योजनाअन्तर्गत सुरक्षा व्यवस्था मिलाइएको छ भने छठ पूजा समितिहरूसँग पनि निरन्तर समन्वय र छलफल भइरहेको छ।
प्रमुख जिल्ला अधिकारी लुइँटेलले धार्मिक सहिष्णुता, आपसी सद्भाव, सामाजिक एकता र भाइचारा कायम राख्दै छठ पर्व मनाउन सम्पूर्ण श्रद्धालु भक्तजनलाई आग्रह गरेका छन्।
यसैबीच, छठ पूजामा विशिष्ट तथा अति विशिष्ट व्यक्तित्वहरू सहभागी हुनसक्ने सम्भावनालाई ध्यानमा राख्दै जिल्ला सुरक्षा समितिले छुट्टै सुरक्षा व्यवस्थापनको तयारी गरेको छ।
विभिन्न राजनीतिक दल तथा सञ्चारमाध्यमबाट विशिष्ट व्यक्तित्वहरूको जनकपुरधाम आगमनबारे जानकारी प्राप्त भएको लुइँटेलले बताए। उनीहरूको आगमनको मिति र सहभागिता निश्चित भएपछि थप सुरक्षा तथा व्यवस्थापकीय प्रबन्ध मिलाइने उनले जानकारी दिए।
विशिष्ट व्यक्तित्वहरूको सम्भावित आगमनका कारण सर्वसाधारण श्रद्धालुको पूजाआजा र दर्शनमा कुनै बाधा नपुग्ने गरी व्यवस्था गरिने पनि उनले स्पष्ट पारे। आम नागरिकले आफ्नो आस्था र परम्पराअनुसार नियमित रूपमा छठ पूजा गर्न पाउने वातावरण सुनिश्चित गरिने उनको भनाइ छ।
Hashtags: