राष्ट्रिय स्वतन्त्र पार्टी (रास्वपा) का सभापति रवि लामिछाने यसवर्ष छठ पर्व मनाउन जनकपुरधाम जाने भएका छन्। उनले पार्टीसँग आबद्ध नभएका सर्वसाधारण नागरिकको घरमा बसेर छठका सम्पूर्ण विधिमा सहभागी हुने तयारी गरेका छन्।
रास्वपाका नेता तथा सांसद मनिष झाले लामिछाने परिवारसहित जनकपुर आउने कार्यक्रम रहेकाले तयारी तीव्र पारिएको जानकारी दिए। उनका अनुसार लामिछानेकी पत्नी निकिता पौडेलले खरनादेखि बिहानको अर्घ्यसम्मका विधिमा व्रत बसेर सहभागी हुने इच्छा व्यक्त गरेकी छन्।
लामिछानेले छठका विधिमा सहभागी हुन पार्टीका कुनै सदस्य वा उनीहरूका आफन्तको घर नभई सामान्य नागरिकको घर छनोट गर्न आग्रह गरेको झाले बताए। राजनीतिक प्रभाव र आग्रहबाट टाढा रहन यस्तो व्यवस्था गर्न खोजिएको उनको भनाइ छ।
झाका अनुसार लामिछानेको भ्रमणका क्रममा कुनै राजनीतिक कार्यक्रम राखिने छैन। बरु सम्भव भएसम्म धेरै छठ घाटमा पुगेर सर्वसाधारणसँग भेटघाट गर्ने योजना बनाइएको छ।
छठ पूजाका क्रममा हुने भीडभाडलाई ध्यानमा राख्दै आवश्यक व्यवस्थापनको तयारी भइरहेको पनि झाले बताए। विगतमा जनकपुरधाममा विवाहपञ्चमीजस्ता कार्यक्रममा राजनीतिक सवारीका कारण व्यापार व्यवसाय प्रभावित हुनुका साथै सर्वसाधारणले असहजता भोग्नुपरेको र सुरक्षा चुनौतीसमेत देखिएको अनुभवका आधारमा यसपटक त्यस्ता समस्या हुन नदिने गरी तयारी गरिएको उनले जानकारी दिए।
यसैबीच, प्रधानमन्त्री बालेन्द्र साहको जनकपुरधाम भ्रमणबारे भने अहिलेसम्म कुनै औपचारिक जानकारी प्राप्त नभएको झाले बताए।