काठमाडौँ । परराष्ट्रमन्त्री शिशिर खनालले संयुक्त राष्ट्रसंघका महासचिव एन्टोनियो गुटेरेससँग भेटवार्ता गरेका छन् ।
टर्कीको अन्ताल्यामा जारी संयुक्त राष्ट्रसंघीय जलवायु परिवर्तनसम्बन्धी पक्ष राष्ट्रहरूको ३१औँ सम्मेलन (कोप–३१) का क्रममा उनीहरूबीच द्विपक्षीय छलफल भएको हो ।
भेटका क्रममा मन्त्री खनालले हालै भोटेकोशी क्षेत्रमा आएको जलवायुजन्य बाढीपछि नेपालप्रति समवेदना र ऐक्यबद्धता व्यक्त गरेकोमा महासचिव गुटेरेसलाई धन्यवाद दिए ।
खनालले संयुक्त राष्ट्रसंघको नेतृत्वमा बहुपक्षीय सहकार्य, विश्व शान्ति, मानवीय गरिमा र दिगो विकासका क्षेत्रमा गुटेरेसले पुर्याउँदै आएको योगदानको प्रशंसासमेत गरे ।
जवाफमा महासचिव गुटेरेसले संयुक्त राष्ट्रसंघीय शान्ति स्थापना अभियानमा नेपाली सेना तथा प्रहरीको सहभागिता र योगदानको सराहना गरे । शान्ति स्थापनाका लागि सुरक्षाकर्मी पठाउने प्रमुख राष्ट्रमध्ये नेपाल रहेको उल्लेख गर्दै उनले विश्व शान्ति र स्थायित्व कायम गर्न नेपालको भूमिकालाई महत्त्वपूर्ण बताए ।
भेटवार्तामा भोटेकोशी बाढीपछि प्रभावित क्षेत्रको पुनःस्थापना तथा पुनर्निर्माणका प्रयासबारे पनि छलफल भएको थियो । त्यसैगरी विश्वव्यापी शासन प्रणालीमा सुधार, बहुप्रकोप पूर्वसूचना प्रणालीको विकास र जलवायु वित्तको विस्तारका विषयमा दुवै पक्षले विचार आदानप्रदान गरेका थिए ।
जलवायु परिवर्तनबाट उत्पन्न चुनौती सामना गर्न अन्तर्राष्ट्रिय सहकार्यलाई थप सशक्त बनाउने विषयमा समेत उनीहरूबीच छलफल भएको थियो ।
भेटमा क्षेत्रीय तथा विश्वव्यापी महत्त्वका विषयसँगै जलवायु कार्यलाई प्रभावकारी बनाउन संयुक्त राष्ट्रसंघ र सदस्य राष्ट्रहरूबीच सहकार्य बढाउनुपर्ने आवश्यकतामा जोड दिइएको थियो ।