काठमाडौँ । मकवानपुरको भीमफेदीमा बिहीबार भएको सवारी दुर्घटनाप्रति नेपाली कांग्रेसले दुःख व्यक्त गरेको छ। शुक्रबार विज्ञप्ति जारी गर्दै कांग्रेसले दुर्घटनामा ज्यान गुमाउनेहरूप्रति श्रद्धाञ्जली अर्पण गर्नुका साथै शोकाकुल परिवारजनमा समवेदना प्रकट गरेको हो।
कांग्रेसले मृतकहरूप्रति भावपूर्ण श्रद्धाञ्जली व्यक्त गर्दै उनीहरूको आत्माको चिरशान्तिको कामना गरेको छ। साथै, दुर्घटनामा घाइते भएकाहरूको शीघ्र स्वास्थ्यलाभको कामना गरेको छ।
पार्टीले मृतकका परिवारलाई तत्काल उचित राहत उपलब्ध गराउन र घाइतेहरूको निःशुल्क तथा प्रभावकारी उपचारको व्यवस्था गर्न सरकारसँग माग गरेको छ।
कांग्रेस केन्द्रीय कार्यालयका कार्यवाहक मुख्यसचिव कृष्णप्रसाद दुलालले जारी गरेको विज्ञप्तिमा पछिल्लो समय देशभर सडक दुर्घटनाका घटना बढ्दै जानु गम्भीर चिन्ताको विषय भएको उल्लेख छ।
दुर्घटनाको जोखिम कम गर्न सरकारले तत्काल उच्चस्तरीय कार्यदल गठन गरी सडक दुर्घटनाका कारणबारे गहन अध्ययन गर्नुपर्ने कांग्रेसको माग छ।
त्यस्तै, सडक सुरक्षा, सवारी साधनको अवस्था, चालकको जिम्मेवारी र यातायात व्यवस्थापनमा रहेका कमजोरी पहिचान गरी नीतिगत तथा व्यावहारिक सुधारका प्रभावकारी कदम चाल्न पनि कांग्रेसले सरकारको ध्यानाकर्षण गराएको छ।