गीतले दर्शकमाझ फिल्मप्रति उत्सुकता बढाएको छ। सामाजिक सञ्जालमा समेत गीतको चर्चा चुलिएको छ। विशेषगरी टिकटकमा यो गीत २० हजारभन्दा बढी भिडियोमा प्रयोग भइसकेको छ।
प्रशान्त सिवाकोटी र मेलिना राईको स्वर रहेको गीतमा सुरज गैरे विवशको शब्द र प्रशान्त सिवाकोटीकै संगीत रहेको छ। प्रेमिल भाव समेटिएको गीतमा प्रेम, विश्वास, लाज र एकअर्काप्रतिको आकर्षणलाई प्रस्तुत गरिएको छ। प्रेममा रहेका युवायुवतीले इसारामार्फत व्यक्त गर्ने मनका भाव गीतको मुख्य आकर्षण बनेका छन्।
गीतको भिडियोमा फिल्मका मुख्य कलाकार विजय बराल र अञ्जना बराइली देखिएका छन्। उनीहरूको नृत्यलाई पनि दर्शकले रुचाएका छन्। गीतको लोकप्रियतासँगै फिल्मप्रति दर्शकको चासो थप बढेको देखिन्छ।
‘सिन्दुरे जात्रा’लाई सरोज पौडेलले निर्देशन गरेका हुन्। फिल्ममा नेपाली चलचित्र क्षेत्रका सफल जोडी विजय बराल र अञ्जना बराइली मुख्य भूमिकामा छन्। यी दुई कलाकारले यसअघि सुपरहिट फिल्म ‘पूर्णबहादुरको सारङ्गी’मा पनि सँगै अभिनय गरेका थिए। ‘सिन्दुरे जात्रा’ उनीहरूको दोस्रो सहकार्य हो।
फिल्ममा विजय र अञ्जनासँगै विनोद न्यौपाने, उषा खड्गी, रामप्रसाद खनाल, लोकेन्द्र लेखक, कमलमणि नेपाल, भोला राज सापकोटा, हिउँवाला गौतम, राकेश खड्का, युना खड्का, अनिता गिरी, रजनी गुरुङ, देशभक्त खनाल र विनोद परियारलगायत कलाकारको अभिनय रहेको छ।
सबिन अधिकारी र वसन्त न्यौपानेको लेखन रहेको फिल्मको कथा निर्देशक पौडेल स्वयंले तयार पारेका हुन्।
‘सिन्दुरे जात्रा’ आगामी मंसिर १८ गतेदेखि प्रदर्शनमा आउने तयारीमा छ।