जिल्लामै पहिलोपटक मुटुको रक्तनलीसम्बन्धी यस्तो उपचार सेवा उपलब्ध भएपछि हृदयाघातलगायत मुटुसम्बन्धी समस्या भएका बिरामीलाई उपचारका लागि अन्य जिल्ला तथा ठूला सहर धाउनुपर्ने बाध्यता कम हुने अपेक्षा गरिएको छ।
प्रतिष्ठानमा मुटुरोगको उपचारका लागि आवश्यक क्याथ ल्याबसहित आधुनिक उपकरणको व्यवस्था गरिएको छ। फिजिसियन तथा मुटुरोग विशेषज्ञ डा. दिनेश उप्रेतीको नेतृत्वमा विशेषज्ञ टोलीले उक्त सेवा प्रदान गरिरहेको छ। प्रतिष्ठानमा इन्टरभेन्सनल कार्डियोलोजी सेवा विस्तारमा डा. उप्रेतीले नेतृत्वदायी भूमिका निर्वाह गरेका छन्।
प्रतिष्ठानका रजिस्ट्रार प्रा. श्याम लम्सालले कार्डियोलोजी विभागअन्तर्गत मुटुरोगसम्बन्धी विभिन्न विशेषज्ञ उपचार सेवा सञ्चालन भइरहेको जानकारी दिए। उनले मुटुरोगको सामान्य परीक्षणदेखि जटिल उपचार तथा शल्यक्रियासम्मका सेवा विस्तार हुनु प्रतिष्ठानका लागि महत्त्वपूर्ण उपलब्धि भएको बताए।
उनका अनुसार प्रतिष्ठानमा मुटुरोगका बिरामीका लागि छुट्टै बहिरङ्ग सेवा (ओपीडी) समेत सञ्चालनमा छ। बिरामीलाई सहज र गुणस्तरीय उपचार उपलब्ध गराउन आवश्यक उपकरण तथा विशेषज्ञ जनशक्तिको व्यवस्थापनलाई प्राथमिकता दिइएको छ।
प्रतिष्ठानको तथ्यांकअनुसार चालु आर्थिक वर्षको असोज महिनामा मात्रै १९७ जना बिरामीले मुटुरोगसम्बन्धी विशेषज्ञ सेवा लिएका छन्। तीमध्ये १९० जनाले ओपीडीमार्फत उपचार गराएका थिए।
सोही अवधिमा मुटुसम्बन्धी साना तथा जटिल प्रकृतिका सातवटा उपचारात्मक प्रक्रिया सफलतापूर्वक सम्पन्न गरिएको प्रतिष्ठानले जनाएको छ।
स्थानीयस्तरमै विशेषज्ञ उपचार सेवा उपलब्ध हुन थालेपछि दाङसहित आसपासका जिल्लाका मुटुरोगीलाई समेत उपचारमा सहजता हुने अपेक्षा गरिएको छ।