काठमाडौँ । चिनियाँ कम्युनिस्ट पार्टीको निमन्त्रणामा चीन भ्रमणमा जान लागेको राष्ट्रिय स्वतन्त्र पार्टी (रास्वपा) को उच्चस्तरीय टोलीले पार्टी सभापति रवि लामिछानेसँग छलफल गर्ने भएको छ।
संसदीय दलका उपनेता गणेश पराजुलीका अनुसार टोलीले शनिबार बिहान ९ बजे बूढानीलकण्ठस्थित लामिछाने निवासमा भेटवार्ता गर्ने कार्यक्रम तय भएको छ।
महामन्त्री विपिनकुमार आचार्यको नेतृत्वमा रास्वपाका २० सदस्य चीनको १० दिने भ्रमणमा जान लागेका हुन्। भ्रमणमा निस्कनुअघि टोलीले शुक्रबार संसदीय दलका नेता तथा प्रधानमन्त्री बालेन्द्र शाहसँग पनि छलफल गरेको थियो। उक्त छलफलमा प्रधानमन्त्री शाहले भ्रमणलाई केवल पर्यटकीय गतिविधिमा सीमित नराखी उपलब्धिमूलक बनाउन निर्देशन दिएका थिए।
पराजुलीका अनुसार भ्रमणका क्रममा नेपाल र चीनबीच आपसी अनुभव आदानप्रदानका साथै सुशासन, आर्थिक विकास, सार्वजनिक सेवा प्रवाह, संस्थागत क्षमता अभिवृद्धि र जनअपेक्षाअनुसारको राजनीतिक नेतृत्वलगायत विषयमा छलफल हुनेछ।
भ्रमण टोलीमा महामन्त्री आचार्यसहित गणेश पराजुली, हरि ढकाल, कविन्द्र बुर्लाकोटी, लिमा अधिकारी आचार्य, समीक्षा बास्कोटा, सागर ढकाल, सुशान्त वैदिक, रीमा विश्वकर्मा, रमेशकुमार सापकोटा, डा. धनञ्जय रेग्मी, गजला शमिम मिकरानी, श्रीराम न्यौपाने, डा. राम लामा, पुनमकुमारी अग्रवाल, डा. आनन्दबहादुर चन्द, डा. सुजाता तामाङ, पुष्पाकुमारी चौधरी, अरविन्द शाह र रत्ना थापा रहेका छन्।