२८ असोज, गोरखा । बूढीगण्डकी नदीमा आएको बाढीका कारण प्रभावित क्षेत्रमा फसेका ६ सय ४८ जनाको उद्धार गरिएको छ। आइतबारदेखि बुधबारसम्म नेपाली सेनाको हेलिकप्टरमार्फत उनीहरूको उद्धार गरिएको सहायक प्रमुख जिल्ला अधिकारी नेत्रप्रसाद शर्माले जानकारी दिए।
उद्धार गरिएकामध्ये ४९ जना विदेशी पर्यटक रहेको शर्माले बताए। बाँकी सबै नेपाली नागरिक हुन्। बाढीले उत्तरी गोरखा जाने पदमार्ग र पुलहरूमा क्षति पुर्याएपछि उक्त क्षेत्रमा रहेका नागरिकहरू आवतजावत गर्न नसकी फसेका थिए।
शर्माका अनुसार आइतबार उद्धार अभियानको पहिलो दिन ९६ जनालाई सुरक्षित स्थानमा ल्याइएको थियो। सोमबार ३ सय २१ र मंगलबार १ सय ८६ जनाको उद्धार गरिएको थियो। बुधबार थप ४५ जनालाई उद्धार गरिएको उनले बताए।
उद्धारसँगै बाढी प्रभावित क्षेत्रमा राहत सामग्री पुर्याउने कामसमेत भइरहेको छ। प्रभावित क्षेत्रतर्फ जाने हेलिकप्टरले राहत सामग्री लिएर जाने र फर्किंदा त्यहाँ फसेका नागरिकलाई उद्धार गरी ल्याउने गरिएको शर्माले जानकारी दिए।
स्थानीय सरकार तथा विभिन्न संघसंस्थासँग समन्वय गरेर राहत सामग्री वितरण भइरहेको छ। प्रभावितहरूका लागि खाद्यान्न, टेन्ट, म्याट, सिरानी, सिरक, त्रिपाल, सोलार र जेनेरेटरलगायत सामग्री उपलब्ध गराइएको शर्माले बताए।
आरुघाट बजारस्थित कभर्ड हलमा राहत सामग्री संकलन गरी हेलिकप्टरमार्फत प्रभावित क्षेत्रमा पठाउने व्यवस्था मिलाइएको छ। बाढीले सडक सञ्जाल र पदमार्गमा क्षति पुर्याएकाले प्रभावित क्षेत्रमा उद्धार तथा राहत सामग्री पुर्याउन हेलिकप्टरकै सहारा लिनुपरेको छ।