२९ असोज, काठमाडौं । राष्ट्रिय वाणिज्य बैंकले सात वर्षे अवधिको ऋणपत्र निष्कासनका लागि आजदेखि आवेदन खुला गरेको छ। ‘आरबीएल डिबेन्चर २०८९’ नामको यस ऋणपत्रमा लगानी गर्नेले वार्षिक ६ प्रतिशत ब्याज प्राप्त गर्नेछन्।
यो ब्याजदर बैंकहरूले व्यक्तिगत मुद्दती निक्षेपमा उपलब्ध गराउने ब्याजभन्दा बढी हो। हाल वाणिज्य बैंकहरूले लामो अवधिको व्यक्तिगत मुद्दती निक्षेपमा अधिकतम साढे ४ प्रतिशतसम्म ब्याज दिँदै आएका छन्।
ऋणपत्रको प्रतिकित्ता अंकित मूल्य एक हजार रुपैयाँ तोकिएको छ। इच्छुक लगानीकर्ताले न्यूनतम २५ कित्ताका लागि आवेदन दिन सक्नेछन्। आवेदन दिने समय छिटोमा कात्तिक १० गतेसम्म र ढिलोमा कात्तिक १२ गतेसम्म कायम रहनेछ।
बिक्री प्रबन्धक कुमारी क्यापिटलले सार्वजनिक गरेको सूचनाअनुसार बैंकले कुल तीन अर्ब रुपैयाँ बराबरका ३० लाख कित्ता ऋणपत्र निष्कासन गर्न लागेको हो। निष्कासन गरिने ऋणपत्रमध्ये ६० प्रतिशत व्यक्तिगत तवरबाट र बाँकी ४० प्रतिशत सर्वसाधारणका लागि बाँडफाँट गरिनेछ।
लगानीकर्ताले अनलाइन प्रणाली मेरोसेयरमार्फत आवेदन दिन सक्नेछन्। साथै, सीआस्बा सदस्य बैंक तथा वित्तीय संस्थाका शाखाबाट पनि आवेदन दिन सकिने व्यवस्था गरिएको छ।
निष्कासनपछि यो ऋणपत्र दोस्रो बजारमा सूचीकृत हुनेछ र त्यहाँबाट खरिदबिक्री गर्न सकिनेछ।