‘कबड्डी ४’ को २१ करोड ४० लाखको रेकर्ड तोड्ने सम्भावना कति ?

काठमाडौं । नेपाली चलचित्र ‘कबड्डी ५’ ले प्रदर्शनको पाँच दिनभित्रै बक्स अफिसमा ७ करोड रुपैयाँभन्दा बढी आम्दानी गरेको छ। निर्माण पक्षका अनुसार चलचित्र हेर्ने दर्शकको संख्या २ लाख ६० हजार नाघेको छ।

प्रदर्शनको दोस्रो दिनमै क्यूएफएक्स सिनेमाजले चलचित्रलाई सुपरहिट घोषणा गरेको थियो। रामबाबु गुरुङको लेखन तथा निर्देशन रहेको चलचित्रमा दयाहाङ राई, विजय बराल, बुद्धि तामाङ, रिश्मा गुरुङ र सृजना गुरुङलगायत कलाकारले अभिनय गरेका छन्।

चलचित्रको निर्माणमा निर्देशक गुरुङसँगै मणिराम पोखरेल, मधु मिजार र विशाल गुरुङ संलग्न छन्।

यसअघि ‘कबड्डी’ शृङ्खलाको चौथो चलचित्रले बक्स अफिसमा २१ करोड ४० लाख रुपैयाँभन्दा बढी कमाइ गरेको थियो। पाँचौँ भागले सुरुवाती दिनमा देखाएको व्यापारिक गति कायम राख्न सके अघिल्लो चलचित्रको कमाइलाई चुनौती दिन सक्ने अनुमान गरिएको छ।

‘कबड्डी’ शृङ्खलाप्रति दर्शकको आकर्षण र सकारात्मक प्रतिक्रियाले नयाँ चलचित्रको व्यापारमा सहयोग पुग्ने अपेक्षा गरिएको छ। यद्यपि, चौथो भागको रेकर्ड तोड्न सफल हुन्छ कि हुँदैन भन्ने कुरा आगामी दिनको प्रदर्शन र बक्स अफिस नतिजाले निर्धारण गर्नेछ।