आयोगका प्रवक्ता परशुराम तिवारीका अनुसार बढुवा सिफारिस समितिको सचिवालयबाट भएका निर्णयका आधारमा योग्यताक्रम सूची सार्वजनिक गर्ने काम भइरहेको छ।
‘शिक्षक सेवा आयोग कार्य सञ्चालन कार्यविधि, २०७८’ संशोधनसहितको परिच्छेद १५ मा गरिएको व्यवस्थाअनुसार आयोगले प्राप्त कागजात र प्रमाण अध्ययन गरेर सम्बन्धित जिल्ला तथा तहका शिक्षकको बढुवा नतिजा निर्धारण गरिरहेको जनाएको छ।
विभिन्न प्रदेशमा शिक्षा हेर्ने मन्त्रालयअन्तर्गतका शिक्षा विकास निर्देशनालयबाट गरिएको कार्यसम्पादन मूल्याङ्कनविरुद्ध परेका उजुरीको अध्ययन तथा छानबिनपछि आयोगले पुनरावलोकनको नतिजा सार्वजनिक गर्दै आएको थियो। तर, आयोगका पदाधिकारी पद रिक्त भएपछि पछिल्लो छ महिनादेखि पुनरावलोकन प्रक्रिया रोकिएको थियो।
आयोगले यसै कात्तिकमा माध्यमिक द्वितीय तहअन्तर्गत इलाम, सुनसरी, झापा र सोलुखुम्बु जिल्लाको पुनरावलोकन नतिजा सार्वजनिक गरेको छ। यसअघि असोज २९ गते प्राथमिक द्वितीय तहअन्तर्गत लमजुङ, बागलुङ, गोरखा, नवलपरासी (बर्दघाट सुस्ता पूर्व) र कास्की जिल्लाको नतिजा प्रकाशन गरिएको थियो।
नेपाल सरकारले गत भदौ २५ गते डा. हरिप्रसाद लम्साललाई आयोगको अध्यक्ष नियुक्त गर्नुका साथै अन्य पदाधिकारी पनि नियुक्त गरेको थियो। यसअघि गत वैशाख १८ गते जारी भएको ‘सार्वजनिक पदाधिकारीको पदमुक्तिसम्बन्धी विशेष व्यवस्था अध्यादेश, २०८३’ का कारण आयोगका पदाधिकारी पदमुक्त भएका थिए।