पाकिस्तानको उत्तरपश्चिमी खैबर पख्तुनख्वा प्रान्तमा अफगानिस्तानतर्फबाट भएको भनिएको मोर्टार आक्रमणमा परी एक जनाको मृत्यु भएको छ भने पाँच जना घाइते भएका छन् ।
पाकिस्तानी अधिकारीहरूका अनुसार मंगलवार राति अक्टोबर २७ मा लोअर साउथ वजिरिस्तान क्षेत्रमा सर्वसाधारणका घर तथा एउटा बजारलाई लक्षित गरी मोर्टार प्रहार भएको थियो । घटनामा केही पसलमा समेत क्षति पुगेको जिल्ला उपआयुक्त मुसर्रत जमानले बुधवार सामाजिक सञ्जाल एक्समार्फत बताएका छन् ।
उनका अनुसार सीमामा तैनाथ पाकिस्तानी सुरक्षा बलले आक्रमणको जवाफ दिइरहेका छन् ।
पाकिस्तान र अफगानिस्तानबीच सीमावर्ती क्षेत्रमा तनाव बढिरहेका बेला पछिल्लो घटना भएको हो । सीमापारबाट हुने गोलीबारीका घटनाले सीमावर्ती क्षेत्रमा बसोबास गर्ने सर्वसाधारणको सुरक्षाप्रति चिन्ता बढाएको छ ।