काठमाडौं, १२ कात्तिक । समुद्री आँधी ‘अर्नब’का कारण भारतको आन्ध्र प्रदेशमा ठूलो क्षति भएको छ। आन्ध्र प्रदेशका मुख्यमन्त्री एन. चन्द्रबाबु नायडूले चक्रवातका कारण राज्यमा पाँच जनाको मृत्यु भएको बताएका छन्।
बंगालको खाडीमा उत्पन्न चक्रवात ‘अर्नब’ मंगलबार मध्यरातपछि बुधबार बिहान भारतीय तटमा ठोक्किएको थियो। यसको प्रभावले आन्ध्र प्रदेश, ओडिशा र तेलंगानाका विभिन्न क्षेत्रमा भारी वर्षा भइरहेको छ।
भारतको मौसम विज्ञान विभागका अनुसार चक्रवात ‘अर्नब’ कमजोर बनेको छ। पछिल्लो ६ घण्टामा यो प्रतिघण्टा करिब १५ किलोमिटरको गतिमा उत्तरतर्फ सरेको र न्यून चापीय क्षेत्रमा परिणत भएको छ।
चक्रवातका कारण सबैभन्दा बढी क्षति आन्ध्र प्रदेशमा भएको छ। भारी वर्षालाई ध्यानमा राख्दै राज्यका विभिन्न जिल्लाका बासिन्दालाई सतर्क रहन आग्रह गरिएको छ। विशेषगरी उत्तरी आन्ध्र प्रदेशका साथै काकीनाडा, कोनासीमा र पूर्वी गोदावरी जिल्लामा बढी वर्षा भइरहेको छ।
आन्ध्र प्रदेश विपद् व्यवस्थापन प्राधिकरणका प्रमुख निर्देशक प्रखर जैनले सर्वसाधारणलाई घरबाट बाहिर ननिस्कन आग्रह गरेका छन्। प्रतिकूल मौसमका कारण जोखिम बढ्न सक्ने भएकाले सतर्कता अपनाउनसमेत उनले सुझाव दिएका छन्।
चक्रवातका कारण आन्ध्र प्रदेशका विभिन्न जिल्लामा बिजुलीका पोलहरू ढलेका छन्। विद्युत् सेवा पुनः सञ्चालन गर्न तेलंगानासँग सहयोग मागिएको छ।
आन्ध्र प्रदेशको विद्युत् विभागका अधिकारीहरूले मुख्यमन्त्रीसँग भएको समीक्षा बैठकमा चक्रवातको प्रभावका कारण कोनासीमा जिल्लामा मात्रै करिब ६ हजार बिजुलीका पोल ढलेको जानकारी दिएका छन्।
त्यस्तै, उत्तरी आन्ध्र प्रदेशका तटीय जिल्लाका विभिन्न क्षेत्रमा विद्युत् लाइन र तारहरू क्षतिग्रस्त भएका छन्। यसका कारण तटीय क्षेत्रका धेरै गाउँ तथा सहरमा विद्युत् आपूर्ति अवरुद्ध भएको छ।
चक्रवात कमजोर बन्दै गए पनि भारी वर्षा र विद्युत् संरचनामा भएको क्षतिले जनजीवन प्रभावित बनाएको छ। प्रभावित क्षेत्रमा विद्युत् सेवा पुनः सञ्चालन गर्नु र थप क्षति हुन नदिन सतर्कता अपनाउनु सम्बन्धित निकायका लागि प्रमुख चुनौती बनेको छ।