टोलेडोमा रेलहरू आपसमा ठोक्किँदा र लिकबाट बाहिरिँदा दुर्घटना भएको थियो। दुर्घटनाका बेला रेलमा ५०० भन्दा बढी यात्रु सवार रहेको बताइएको छ। स्पेनिस फुटबल महासंघले दुर्घटनाका पीडितप्रति ऐक्यबद्धता जनाउँदै खेल स्थगित गर्ने निर्णय गरेको जनाएको छ।
बुधबार हुने पहिलो चरणका खेलमा लेभान्ते, अलाभेस, भ्यालेन्सिया, सेल्टा भिगो र रियल बेटिससहित पाँच शीर्ष श्रेणीका टोली सहभागी हुने तालिका थियो। तर, रियल म्याड्रिड, बार्सिलोना र एट्लेटिको म्याड्रिडजस्ता ठूला क्लबले भने अन्तिम ३२ को चरणबाट प्रतियोगितामा सहभागिता जनाउनेछन्।
दुर्घटनापछि बार्सिलोनाले सामाजिक सञ्जालमार्फत पीडितप्रति गहिरो समवेदना व्यक्त गरेको छ। क्लबले लोस येबेनेस र उर्डा (टोलेडो) बीच भएको गम्भीर रेल दुर्घटनाबाट प्रभावित परिवार तथा आफन्तप्रति ऐक्यबद्धता जनाउँदै घाइतेहरूको शीघ्र स्वास्थ्यलाभको कामना गरेको छ।
त्यस्तै, रियल म्याड्रिडले पनि आफ्नो आधिकारिक वेबसाइटमार्फत दुर्घटनाप्रति दुःख व्यक्त गरेको छ। क्लबले ज्यान गुमाउनेका परिवारप्रति समवेदना प्रकट गर्दै घाइते तथा प्रभावित व्यक्तिहरूप्रति सहानुभूति जनाएको छ। साथै, उद्धार कार्यमा खटिएका आपत्कालीन सेवाका टोलीलाई पूर्ण सहयोग गर्ने प्रतिबद्धता व्यक्त गरेको छ।
बिहीबारका लागि निर्धारित खेलहरू भने पूर्वनिर्धारित तालिकाअनुसार सञ्चालन हुने जनाइएको छ। बुधबार स्थगित भएका खेलहरूको नयाँ तालिका भने स्पेनिस फुटबल महासंघले सार्वजनिक गरेको छैन।