राष्ट्रिय निकुञ्ज तथा वन्यजन्तु संरक्षण विभागले शुक्लाफाँटा राष्ट्रिय निकुञ्ज कार्यालयलाई रेडियो कलर जडानको प्रक्रिया अघि बढाउन निर्देशन दिएको हो।
हात्तीको आवागमनसम्बन्धी जानकारी संकलन गरी मानव र वन्यजन्तुबीचको द्वन्द्व न्यूनीकरण गर्ने उद्देश्यले रेडियो कलरको व्यवस्था गर्न लागिएको विभागले जनाएको छ।
रेडियो कलरबाट प्राप्त तथ्यांक नियमित रूपमा अनुगमन र विश्लेषण गरिनेछ। यसबाट हात्तीको आवागमन, सम्भावित गन्तव्य तथा बस्तीमा प्रवेश गर्न सक्ने जोखिमबारे पूर्वानुमान गर्न सहयोग पुग्ने अपेक्षा गरिएको छ।
कृषि, वन तथा पर्यावरणमन्त्री गीता चौधरीले रेडियो कलरबाट प्राप्त विवरणको नियमित विश्लेषणमार्फत हात्तीको गतिविधि पहिचान गर्न र सम्भावित जोखिमबारे समयमै जानकारी लिन सकिने बताइन्।
उनका अनुसार यस प्रविधिको प्रयोगले जोखिमयुक्त क्षेत्रका स्थानीय बासिन्दालाई अग्रिम सतर्क गराउन सहज हुनेछ। साथै, मानवीय क्षति, बालीनालीको नोक्सानी र भौतिक सम्पत्तिमा हुने क्षति कम गर्न पनि सहयोग पुग्ने अपेक्षा गरिएको छ।
मन्त्री चौधरीले रेडियो कलर जडान गर्दा निकुञ्जका वरिष्ठ संरक्षण अधिकृतको प्रत्यक्ष निगरानीमा पशु चिकित्सकसहितको प्राविधिक टोली परिचालन गरिने जानकारी दिइन्।
उनले हात्तीको सुरक्षा र हितलाई प्राथमिकतामा राखेर वैज्ञानिक विधिबाट रेडियो कलर जडान गर्ने तथा जडानपछि पनि नियमित अनुगमनलाई निरन्तरता दिने बताइन्।