काठमाडौं । नेपाली कांग्रेसका सभापति गगनकुमार थापाले बिचौलियासँग जोडिएका सबै प्रकरणको गहिराइमा पुगेर निष्पक्ष अनुसन्धान गर्न सरकारसँग माग गरेका छन् ।
आइतबार पार्टी केन्द्रीय कार्यालय सानेपामा आयोजित कार्यक्रममा बोल्दै सभापति थापाले बिचौलिया प्रकरणमा संलग्न सबै व्यक्तिको पहिचान गरी दोषीमाथि कारबाही गर्नुपर्ने बताएका छन् । उनले अनुसन्धानमा सरकारलाई नेपाली कांग्रेसको पूर्ण साथ र समर्थन रहने स्पष्ट पारेका छन् ।
तर अनुसन्धानको निष्पक्षतामाथि भने उनले आशंका व्यक्त गरेका छन् । अनुसन्धान भइरहेको भनिए पनि अनुसन्धान गर्ने निकायभित्रैका व्यक्तिहरूको संलग्नतासम्बन्धी विवरण सार्वजनिक हुन थालेको भन्दै उनले अनुसन्धानको विश्वसनीयतामाथि प्रश्न उठाएका छन् ।
थापाले अनुसन्धानका क्रममा सार्वजनिक भएका विवरणका आधारमा मात्रै कसैलाई दोषी करार गर्न नमिल्ने बताउँदै प्रमाणका आधारमा सबै पक्षको निष्पक्ष छानबिन हुनुपर्नेमा जोड दिएका छन् । यसअघि गठन भएका विभिन्न छानबिन समितिका प्रतिवेदनसमेत सार्वजनिक नभएको उल्लेख गर्दै समितिका प्रतिवेदन आवश्यकताअनुसार प्रयोग गर्ने र नचाहिएका प्रतिवेदन थन्क्याउने प्रवृत्ति अन्त्य हुनुपर्ने उनले बताएका छन् ।
थापाले अनुसन्धान प्रक्रियाको निगरानी गर्न सञ्चारमाध्यम, नागरिक समाज र राजनीतिक दलहरूलाई आग्रह गरेका छन् । नेपाली कांग्रेसले संसद् र संसदीय समितिमार्फत पनि यस विषयलाई प्रभावकारी रूपमा उठाउने उनको भनाइ छ ।
सभापति थापाले न्यायपालिकाको स्वतन्त्रता, निष्पक्षता र निर्भीकतामाथि पनि गम्भीर प्रश्न उठिरहेको बताएका छन् । प्रधानमन्त्री कार्यालयको हवाला दिँदै अदालतमा विचाराधीन मुद्दाबारे कार्यपालिकाको चाहना व्यक्त गरिएको भन्ने विवरण सार्वजनिक हुनु र न्यायालयसँग जोडिएका आर्थिक लेनदेनका विषय बाहिर आउनुले न्यायपालिकाको स्वतन्त्रतामाथि आशंका पैदा गरेको उनले बताएका छन् ।
सभापति थापाले बिचौलियासँग सम्बन्धित विषय र त्यसमा जोडिएका सबै प्रकरणको गहिरो, निष्पक्ष तथा प्रमाणमा आधारित अनुसन्धान हुनुपर्ने बताएका छन् । दोषी देखिने जोकोहीलाई कानुनी कारबाही गर्नुपर्नेमा जोड दिँदै उनले यस विषयमा सरकारलाई कांग्रेसको पूर्ण साथ र समर्थन रहेको बताएका छन् ।
तर अनुसन्धान निष्पक्ष हुन्छ कि हुँदैन भन्नेमा गम्भीर प्रश्न र आशंका रहेको उनको भनाइ छ । सञ्चारमाध्यममा सार्वजनिक भइरहेका विवरणले अनुसन्धान चयनात्मक ढङ्गले अघि बढेको हो कि भन्ने आशंका पैदा गरेको उनले बताएका छन् । अनुसन्धान गर्ने निकायभित्रैका व्यक्तिहरूको संलग्नताका विषयसमेत बाहिर आइरहेकाले समग्र अनुसन्धान प्रक्रिया पारदर्शी र निष्पक्ष हुनुपर्ने उनले बताएका छन् ।
विगतमा गठन भएका विभिन्न छानबिन समितिका प्रतिवेदनसमेत सार्वजनिक नभएको उल्लेख गर्दै उनले गृहमन्त्रीको सम्पत्ति, भदौ २३ र २४ गतेका घटना तथा सुनसरीको कप्तानगञ्जलगायतका विषयमा बनेका समितिका प्रतिवेदन सार्वजनिक गर्नुपर्ने बताएका छन् । आवश्यकताअनुसार प्रतिवेदन प्रयोग गर्ने र नचाहिएका प्रतिवेदन थन्क्याउने प्रवृत्ति अन्त्य हुनुपर्ने उनको माग छ ।
न्यायपालिका पनि स्वतन्त्र, निष्पक्ष र निर्भीक हुनुपर्ने उल्लेख गर्दै प्रधानमन्त्री कार्यालयको हवाला दिँदै अदालतमा विचाराधीन मुद्दालाई प्रभावित पार्ने प्रयास भएको भन्ने विवरण तथा आर्थिक लेनदेनका विषयले गम्भीर प्रश्न उठाएको उनले बताएका छन् ।
यी सबै विषयको निष्पक्ष छानबिन हुनुपर्ने र कांग्रेसले संसद्, संसदीय समिति तथा सार्वजनिक बहसका माध्यमबाट निरन्तर आवाज उठाउने उनले बताएका छन् । अनुसन्धान प्रक्रियाको निगरानी गर्न सञ्चारमाध्यम र नागरिकलाई पनि उनले आग्रह गरेका छन् ।
न्यायपालिका स्वतन्त्र, निष्पक्ष र निर्भीक भए मात्रै लोकतन्त्र बलियो हुने उल्लेख गर्दै थापाले न्यायालयभित्रका विकृति तथा गलत कार्यमा संलग्न व्यक्तिमाथि कारबाही हुनुपर्ने बताएका छन् । न्यायपालिकाको व्यापक सुधारका लागि नेपाली कांग्रेस सबै राजनीतिक दलसँग संवाद र छलफल गर्न तयार रहेको पनि उनले स्पष्ट पारेका छन् ।
तर अहिले सार्वजनिक भएका विषयलाई राजनीतिक स्वार्थ र पूर्वाग्रहका आधारमा हतियार बनाउन नहुने उनको चेतावनी छ । न्यायपालिकाप्रति जनताको आस्था कायम राख्दै न्यायमूर्तिहरूले निर्भीक भएर काम गर्न सक्ने वातावरण सुनिश्चित गर्न पनि थापाले सरकारको ध्यानाकर्षण गराएका छन् ।