काठमाडौं । नेपाली कांग्रेसका महामन्त्री प्रदीप पौडेलले वर्तमान सरकारले प्रतिपक्षी दल, संसद्, नागरिक र सञ्चारमाध्यमप्रति उपेक्षापूर्ण व्यवहार देखाएको आरोप लगाएका छन् ।
सोमबार सिंहदरबारमा बसेको कांग्रेस संसदीय दलको बैठकमा बोल्दै पौडेलले सरकारका गतिविधि स्वेच्छाचारी प्रकृतिका हुँदै गएको टिप्पणी गरे । उनका अनुसार सरकारले संविधान र कानुनी व्यवस्थाको मर्मविपरीत काम गर्दै राज्यसत्ताको दुरुपयोग गरिरहेको छ ।
बैठकमा पौडेलले संवैधानिक निकायहरूको भूमिकासमेत कमजोर पार्ने प्रयास भइरहेको धारणा राखेका थिए । कानुनी शासनको आधार कमजोर बनाउने गरी सरकार अघि बढेको भन्दै उनले यस्ता गतिविधिविरुद्ध संसद्मा प्रभावकारी रूपमा आवाज उठाउनुपर्नेमा जोड दिए ।
सरकारका निर्णय र कार्यशैलीबारे प्रश्न उठाउन अन्य प्रतिपक्षी दलहरूसँग समेत सहकार्य गर्नुपर्ने उनको प्रस्ताव थियो । यसका लागि प्रतिनिधिसभा र राष्ट्रिय सभाको बैठक तत्काल बोलाउन कांग्रेसले माग गर्नुपर्ने उनले बताएका छन् ।
त्यस्तै, न्यायालयमा विचौलियासँग न्यायाधीश, सरकार प्रमुख तथा प्रहरी नेतृत्वको नाम जोडिएको भनिएको ‘सेटिङ प्रकरण’को निष्पक्ष छानबिन गर्न पौडेलले उच्चस्तरीय संसदीय समिति गठन गर्नुपर्ने माग गरेका छन् ।
सरकार आफैंले उक्त प्रकरणको निष्पक्ष अनुसन्धान गर्नेमा आशंका व्यक्त गर्दै उनले संसदीय समितिमार्फत घटनाको सत्यतथ्य बाहिर ल्याउनुपर्ने धारणा राखेका थिए ।