काठमाडौं । टाटा कमर्सियल सवारीसाधनको मर्मतसम्भारमा संलग्न प्राविधिक जनशक्तिको क्षमता विकास गर्ने उद्देश्यले देशका १४ स्थानमा ‘टाटा BS-6 प्राविधिक तालिम’ सुरु गरिएको छ ।
नेपालका लागि टाटा जेनुइन पार्ट्सको आधिकारिक वितरक सिप्रदी अटोपार्ट्स प्रा.लि. र सिप्रदियन सहायता संस्थाको सहकार्यमा छदिने प्रशिक्षण कार्यक्रम सञ्चालन गरिएको हो । कात्तिक २० गतेसम्म चल्ने तालिम हेटौंडा, बिर्तामोड, विराटनगर, दमक, धनगढी, पर्सा/टाँडी, इटहरी, नारायणघाट, मिर्चैया, पोखरा, भैरहवा, ढल्केवर, दाङ/घोराही र वीरगञ्जमा आयोजना भइरहेको छ ।
प्रशिक्षणमा टाटा कमर्सियल गाडीमा काम गर्ने प्राविधिक तथा इलेक्ट्रिसियनलाई आधुनिक भारत स्टेज–६ (BS-6) प्रविधिबारे सैद्धान्तिक र प्रयोगात्मक ज्ञान दिइनेछ । सवारीसाधनको विद्युतीय संरचना, ब्याट्री, मल्टिमिटर सञ्चालन, स्टार्टिङ तथा चार्जिङ प्रणाली र इन्जिन व्यवस्थापन प्रणालीअन्तर्गतका ECU, सेन्सर तथा एक्टुएटरबारे तालिममा विशेष जोड दिइएको छ ।
त्यस्तै, उत्सर्जन नियन्त्रणका लागि प्रयोग हुने SCR र LNT प्रणाली तथा आधुनिक डायग्नोस्टिक उपकरणमार्फत सवारीसाधनमा देखिने प्राविधिक समस्या पहिचान र समाधान गर्ने विधिसमेत सिकाइने आयोजकले जनाएको छ ।
नयाँ प्रविधिबारे प्राविधिक जनशक्तिको ज्ञान र सीप अद्यावधिक गर्दै उनीहरूको व्यावसायिक दक्षता बढाउने कार्यक्रमको लक्ष्य रहेको छ । यसबाट टाटा सवारीसाधनका ग्राहकले अझ प्रभावकारी र गुणस्तरीय मर्मतसम्भार सेवा पाउने अपेक्षा आयोजकले गरेको छ ।