गत १ कात्तिकदेखि बिग्रिएको उक्त टावर मर्मत गरी सञ्चालनमा ल्याइएको भए पनि पाँच दिनपछि पुनः समस्या देखिएपछि स्थानीयवासी सञ्चार सेवाबाट प्रभावित भएका हुन् ।
टावरमा आएको खराबीका कारण हुम्लाका चंखेली, सर्केगाड र अदानचुली गाउँपालिका तथा मुगुको सोरु गाउँपालिकाका नेपाल टेलिकमका सेवाग्राहीले समस्या भोग्नुपरेको छ ।
चंखेली गाउँपालिकाकी उपाध्यक्ष प्रेमकला शाहीले टेलिकमको नेटवर्कमा बारम्बार समस्या देखिँदा स्थानीय नागरिकको गुनासो बढ्दै गएको बताइन् । नियमित सञ्चार सेवा उपलब्ध नहुँदा सेवाग्राहीलाई असहज भएको उनको भनाइ छ ।
त्यस्तै, सर्केगाड गाउँपालिका–१ जैरको बेताल भन्ने स्थानमा रहेको नेपाल टेलिकमको टावरले काम गर्न छाडेपछि गाउँपालिकाका विभिन्न क्षेत्रका बासिन्दा सञ्चार सेवाबाट वञ्चित भएका छन् ।
वडा नम्बर १ का सचिव पाण्डव बुढाले टेलिकमको टावरमा पटक–पटक समस्या देखिने गरेकाले हुम्लाका तीन स्थानीय तहका नागरिकले सञ्चारविहीन हुनुपर्ने अवस्था आएको गुनासो गरे ।
नेपाल टेलिकम हुम्लाकी प्रमुख रिन्जिन लामाका अनुसार मुगुको सोरुकोटस्थित रिले टावरमा प्राविधिक समस्या देखिएको हो । समस्या समाधानका लागि प्राविधिक टोली परिचालन गरी मर्मतको काम भइरहेको उनले जानकारी दिइन् ।