नमुनाका रूपमा कपिलवस्तु र गोकर्णेश्वर नगरपालिका छनोट
- स्वास्थ्य बीमा बोर्डले स्थानीय तह र प्रदेश सरकारमार्फत नागरिकलाई बीमामा आबद्ध गराउन एच.आई.बी.ई. पोर्टल सञ्चालनमा ल्याएको छ।
- नयाँ प्रणालीबाट स्थानीय तहले आफ्नै ड्यासबोर्ड प्रयोग गरी बीमा दर्ता, नवीकरण, योगदान रकम भुक्तानी र अभिलेख व्यवस्थापन गर्न सक्नेछन्।
- डिजिटल प्रणालीले बीमा प्रक्रिया सहज, पारदर्शी र छिटो बनाउने अपेक्षा गरिएको छ।
काठमाडौं । नागरिकलाई स्वास्थ्य बीमा कार्यक्रममा आबद्ध गराउने प्रक्रिया सहज बनाउन स्वास्थ्य बीमा बोर्डले स्थानीय तह र प्रदेश सरकारलाई लक्षित गर्दै नयाँ डिजिटल सेवा सुरु गरेको छ। बोर्डले एच.आई.बी.ई. पोर्टलमार्फत ‘सामूहिक आबद्धता तथा नवीकरण’ सेवा सञ्चालनमा ल्याएको हो।
कार्यक्रमको पहिलो चरणमा कपिलवस्तु नगरपालिका र काठमाडौंको गोकर्णेश्वर नगरपालिकालाई प्रणालीमा संस्थागत पहुँच प्रदान गरिएको छ। यी दुई पालिकालाई नमुनाका रूपमा छनोट गर्दै सेवाको औपचारिक सुरुवात गरिएको बोर्डले जनाएको छ।
नयाँ प्रणाली कार्यान्वयनमा आएपछि प्रदेश तथा स्थानीय सरकारले आफ्नै ड्यासबोर्डबाट नागरिकको बीमा दर्ता गर्न, पुरानो बीमा नवीकरण गर्न, योगदान रकम भुक्तानी गर्न र विवरण सुरक्षित राख्न सक्नेछन्। यसका लागि सम्बन्धित पालिकाले स्वास्थ्य बीमा बोर्डका प्रदेश तथा जिल्ला कार्यालयसँग समन्वय गर्नुपर्नेछ।
यसअघि बीमा कार्यक्रममा नागरिकलाई सामूहिक रूपमा आबद्ध गराउन वडाबाट विवरण सङ्कलन गरी फारम भर्ने र नगरपालिकामार्फत बोर्डमा पठाउने प्रक्रिया अपनाइन्थ्यो। नयाँ व्यवस्थाले उक्त प्रक्रियालाई अनलाइन प्रणालीमा जोडेर प्रशासनिक कामको बोझ घटाउने अपेक्षा गरिएको छ।
स्थानीय तहले आफ्नो युजर आईडी प्रयोग गरी पोर्टलमा नागरिकको विवरण प्रविष्ट गरेर सामूहिक रूपमा बीमा गराउन सक्नेछन्। अनलाइनबाट विवरण बुझाएपछि बीमा कार्डसमेत प्रणालीमार्फत तयार हुनेछ। बीमाका लागि लाग्ने योगदान रकमको हिसाब र भुक्तानी पनि यही पोर्टलबाट गर्न सकिने व्यवस्था मिलाइएको छ।
स्वास्थ्य बीमा बोर्डका प्रवक्ता डा. पवनकुमार शाहका अनुसार बोर्डले उपलब्ध गराएको युजरनेम र पासवर्ड प्रयोग गरी स्थानीय तहले नागरिकको विवरण दर्ता गर्न सक्नेछन्। बीमाबापतको रकम सम्बन्धित स्थानीय तहले भुक्तानी गर्ने व्यवस्था रहने उनले बताए।
यसअघि केही पालिकामा वडाले नागरिकको विवरण सङ्कलन गरेर फारम भर्ने र नगरपालिकामा बुझाउने प्रक्रिया अपनाउँदा काम केही झन्झटिलो हुने गरेको शाहले बताए।
उनका अनुसार अब पालिकालाई आफ्नै ड्यासबोर्डबाट विवरण प्रविष्ट गर्ने, नागरिकलाई बीमामा आबद्ध गर्ने र कार्ड तयार पार्ने सुविधा उपलब्ध गराइएको छ। कुनै संस्थाले सामूहिक रूपमा स्वास्थ्य बीमा गराउन चाहेमा पनि आवश्यक युजरनेम र पासवर्ड उपलब्ध गराउन सकिने उनले जानकारी दिए।
गोकर्णेश्वर र कपिलवस्तु नगरपालिकाले यसअघि पनि स्थानीय नागरिकको स्वास्थ्य बीमासम्बन्धी दाबी भुक्तानीमा सहयोग गर्दै आएका थिए। अन्य स्थानीय तहलाई समेत यस कार्यक्रममा सहभागी हुन प्रेरित गर्ने उद्देश्यले यी दुई पालिकाबाट नयाँ सेवा सुरु गरिएको बोर्डले जनाएको छ।