धार्मिक तथा सांस्कृतिक मान्यताअनुसार कुकुरलाई यमराजको दूत र द्वारपालका रूपमा लिइन्छ। कुकुरले घरको सुरक्षा गर्नुका साथै मानिसप्रति देखाउने वफादारी र सहयोगी व्यवहारको सम्मानस्वरूप तिहारको दोस्रो दिन विशेष पूजा गर्ने चलन रहिआएको छ।
कुकुर पूजाका अवसरमा आज विभिन्न स्थानमा कुकुरलाई फूलमाला लगाउने, निधारमा टीका लगाइदिने र मिठा खानेकुरा खुवाउने कार्यक्रम भइरहेका छन्। यस दिन कुकुरलाई सम्मान र माया व्यक्त गर्दै धार्मिक विधिअनुसार पूजा गर्ने गरिन्छ।
यमपञ्चकको पहिलो दिन काग पूजा गरिएको थियो भने दोस्रो दिन कुकुर पूजा गरिन्छ। त्यसपछि तेस्रो दिन लक्ष्मी पूजा, चौथो दिन गोवर्द्धन पूजा तथा म्हः पूजा र पाँचौँ दिन भाइटीका मनाउने धार्मिक परम्परा छ।
यसरी पाँच दिनसम्म विभिन्न धार्मिक तथा सांस्कृतिक विधिअनुसार मनाइने तिहारले नेपाली समाजमा आपसी सद्भाव, प्रेम र पारिवारिक सम्बन्धलाई थप प्रगाढ बनाउने विश्वास गरिन्छ।