काठमाडौं । साउदी अरेबियामाथि पाँच विकेटको शानदार जित निकाल्दै नेपाल एसीसी प्रिमियर कप २०२६ को सेमिफाइनलमा प्रवेश गरेको छ।
मलेसियाको बायुमास ओभलमा आइतबार भएको खेलमा साउदीले दिएको १९१ रनको लक्ष्य नेपालले ४१ ओभरमा पाँच विकेट गुमाएर पूरा गर्यो।
नेपालको जितमा इशान पाण्डेले महत्वपूर्ण ४० रनको योगदान दिए। उनले ५९ बलमा दुई चौका प्रहार गरे। देव खनालले ३९ रन बनाए भने रोहितकुमार पौडेल २४ रनमा अविजित रहे। आसिफ शेखले २० र अर्जुन कुमालले १५ रन जोडे।
त्यसअघि टस जितेर पहिले ब्याटिङ गरेको साउदी अरेबिया ४९.२ ओभरमा १९० रनमा अलआउट भएको थियो। साउदीका लागि ओपनर अब्दुल वाहिदले सर्वाधिक ७७ रन बनाए। उनले ८९ बलमा १० चौका र दुई छक्का प्रहार गरे। मुहम्मद अतिफले ३० तथा मोहम्मद हिशाम शेखले २८ रन बनाए।
साउदीको स्कोर उकास्ने क्रममा वाहिद र अतिफले दोस्रो विकेटका लागि ९४ रनको महत्वपूर्ण साझेदारी गरेका थिए। तर नेपाली बलरले त्यसपछि लगातार विकेट निकाल्दै साउदीलाई ठूलो स्कोर बनाउनबाट रोके।
नेपालका लागि सन्दीप लामिछाने र दीपेन्द्रसिंह ऐरीले समान तीन–तीन विकेट लिए। ललितराजवंशीले दुई तथा शेर मल्ल र गुल्शन झाले समान एक विकेट हात पारे।
यो नेपालका लागि प्रतियोगितामा लगातार तेस्रो जित हो। यसअघि नेपालले बहराइन र आयोजक मलेसियालाई पराजित गरेको थियो। लगातार तीन जितसँगै नेपाल समूह ‘ए’ को शीर्ष स्थानमा रहँदै सेमिफाइनलमा पुगेको हो।
नेपालले अब समूह चरणको अन्तिम खेल हङकङसँग खेल्नेछ।
१० टोली सहभागी एसीसी प्रिमियर कपको विजेताले एसिया कपमा स्थान बनाउनेछ। नेपाल सन् २०२३ पछि पुनः एसिया कप खेल्ने लक्ष्यसहित प्रतियोगितामा प्रतिस्पर्धा गरिरहेको छ।