एजेन्सी । प्रजातान्त्रिक गणतन्त्र कङ्गो (डीआरसी) ले तीव्र गतिमा फैलिरहेको इबोला महामारी नियन्त्रणका लागि १८० दिने नयाँ बहुक्षेत्रीय प्रतिकार्य योजना सार्वजनिक गरेको छ । सरकारले आगामी छ महिनाका लागि तयार पारेको योजनाको प्रभावकारी कार्यान्वयन गर्न करिब १ अर्ब ३० करोड अमेरिकी डलर आवश्यक पर्ने जनाएको छ ।
विश्व स्वास्थ्य संगठन (डब्लुएचओ), अफ्रिका सेन्टर फर डिजिज कन्ट्रोल एन्ड प्रिभेन्सन (अफ्रिका सीडीसी) तथा अन्य अन्तर्राष्ट्रिय साझेदारको सहकार्यमा तयार गरिएको योजनाले इबोला नियन्त्रणका लागि आवश्यक स्वास्थ्य सेवा, स्रोत परिचालन, समन्वय र सामुदायिक सहभागिताको खाका प्रस्तुत गरेको छ ।
डब्लुएचओको अफ्रिकी क्षेत्रीय कार्यालयका अनुसार ‘बुन्डिबुग्यो’ भाइरसका कारण फैलिएको संक्रमणबाट सेप्टेम्बर २ सम्म ६ हजार ३४२ जना संक्रमित भएका छन् भने ३ हजार ७२ जनाको मृत्यु भइसकेको छ । संक्रमण हाल देशका ६ प्रान्तअन्तर्गत ६० स्वास्थ्य क्षेत्रमा फैलिएको छ ।
स्वास्थ्य अधिकारीहरू अस्पतालसम्म पुग्नुअघि नै समुदायस्तरमा संक्रमितको मृत्यु हुन थालेपछि थप चिन्तित बनेका छन् । डब्लुएचओका कङ्गोस्थित कार्यवाहक प्रतिनिधि एन एन्कियाले ढिलो पहिचान, सम्पर्कमा नआएका संक्रमित तथा स्रोत परिचालनमा हुने ढिलाइले मानवीय क्षति बढाइरहेको बताउँदै तत्काल व्यापक र समन्वयात्मक कदम चाल्न आग्रह गरेका छन् ।
स्वास्थ्य मन्त्री रोजर काम्बाले इबोला नियन्त्रण स्वास्थ्य क्षेत्रको मात्रै जिम्मेवारी नभएको बताएका छन् । उनका अनुसार सरकार, समुदाय, अन्तर्राष्ट्रिय साझेदार तथा दातृ निकायबीचको एकीकृत प्रयासबाट मात्रै महामारी नियन्त्रण गर्न सकिन्छ ।
संयुक्त राष्ट्रसङ्घका आवासीय संयोजक डामियन मामाले पनि इबोला प्रतिकार्यलाई व्यापक मानवीय सहायता अभियानसँग जोड्नुपर्ने र त्यसका लागि पर्याप्त तथा लचिलो वित्तीय स्रोत आवश्यक रहेको बताएका छन् । अफ्रिका सीडीसीले स्रोत परिचालन, समन्वय र सामुदायिक सहभागितामा निरन्तर सहयोग गर्ने प्रतिबद्धता जनाएको छ ।
गत मेमा औपचारिक रूपमा घोषणा गरिएको यो प्रकोपलाई कङ्गोको इतिहासमै सबैभन्दा तीव्र गतिमा फैलिएको इबोला महामारीका रूपमा लिइएको छ ।