काठमाडौं । काठमाडौं महानगरपालिकाले आगामी आर्थिक वर्ष युवालाई लक्षित गर्दै स्वरोजगारका अवसर सिर्जना गर्ने कार्यक्रम सञ्चालन गर्ने भएको छ।
महानगरले आगामी आर्थिक वर्षका लागि प्रस्ताव गरेको बजेटमा युवा केन्द्रित स्वरोजगार कार्यक्रमका लागि १० करोड रुपैयाँ छुट्याइएको छ। युवाको सहभागिता र सहकार्यमा सञ्चालन हुने विभिन्न कार्यक्रमका लागि समेत आवश्यक बजेटको व्यवस्था गरिएको महानगरले जनाएको छ।
त्यसैगरी, ‘जेनजी’ सहिद तथा अमर प्रहरीको योगदानलाई स्मरण गर्ने उद्देश्यले उनीहरूको नाम समेटिएको स्मारक निर्माणका लागि पनि बजेट छुट्याइएको छ।
महानगरकी उपप्रमुख सुनिता डंगोलले प्रस्तुत गरेको बजेटमा अपांगता भएका व्यक्ति, अशक्त तथा उमेरका कारण हिँडडुल गर्न कठिनाइ हुने महानगरवासीलाई लक्षित गर्दै घरमै नागरिकता तथा राष्ट्रिय परिचयपत्र उपलब्ध गराउने व्यवस्था गर्ने उल्लेख छ।
यसका लागि सम्बन्धित सरकारी निकायसँग आवश्यक समन्वय गरी सेवा प्रवाहलाई सहज बनाउने र आवश्यक बजेट व्यवस्थापन गर्ने महानगरको योजना छ।
महानगरले युवा रोजगारी, सामाजिक सम्मान तथा घरदैलोमै सार्वजनिक सेवा उपलब्ध गराउने विषयलाई आगामी आर्थिक वर्षको बजेटमा प्राथमिकताका साथ समेटेको छ।