नेपाली काँग्रेसकी सांसद सीता थपलियाले काठमाडौं उपत्यकाका विभिन्न स्थानबाट हटाइएका सुकुम्बासी नागरिकको पुनस्र्थापनामा भएको उपलब्धि सार्वजनिक गर्न सरकारसँग माग गरेकी छन्।
प्रतिनिधि सभाको बिहीवारको बैठकमा बोल्दै उनले सरकार नागरिकका आधारभूत समस्या समाधान गर्न असफल भएको आरोप लगाइन्। मन्त्रीहरूले खुट्टा भाँच्ने र पाता फर्काउने कुरा गर्ने तर नागरिक रित्तो ग्यास सिलिन्डर बोकेर दिनभर लाइनमा बस्नुपर्ने अवस्था रहेको भन्दै उनले सरकारको कार्यशैलीप्रति आपत्ति जनाइन्।
सुकुम्बासी नागरिकको घर भत्काइएपछि विभिन्न कारणले १० जनाको मृत्यु भएको दाबी गरिएको उल्लेख गर्दै थपलियाले सरकारले यसबारे आधिकारिक तथ्यांक सार्वजनिक गर्नुपर्ने बताइन्।
सुकुम्बासी बस्तीमा डोजर चलाएर टहरा हटाउनु मात्र समस्याको समाधान नभएको भन्दै उनले वास्तविक सुकुम्बासीलाई सम्मानपूर्वक स्थायी आवास र अधिकार उपलब्ध गराउन माग गरिन्।
उनले २०८३ साल वैशाख १३ गते काठमाडौंका नदी किनारमा बस्दै आएका सुकुम्बासी बस्तीमा डोजर चलाइएको र घर भत्काएपछि कतिपय परिवारलाई होल्डिङ सेन्टरमा राखिएको बताइन्। विस्थापनपछि विभिन्न कारणले मृत्यु भएका घटनाहरू सार्वजनिक भएको तथा सुकुम्बासी मोर्चाले १० जना नागरिकको मृत्यु भएको दाबी गरेको उल्लेख गर्दै उनले सरकारले अहिलेसम्म आधिकारिक तथ्यांक सार्वजनिक नगरेको बताइन्।
थपलियाले कति परिवारको पहिचान भयो, कति परिवारलाई स्थायी आवास दिइयो र बाँकी परिवारलाई कहिले आवास उपलब्ध गराइन्छ भन्ने विषयमा सरकारले स्पष्ट जानकारी दिनुपर्ने माग गरिन्।
पुराना राजनीतिक दलका कमजोरीमाथि प्रश्न उठाउन पाइने भए पनि पुराना दललाई गाली गरेर मात्र नयाँ मान्यता स्थापित नहुने उनको भनाइ थियो।