काठमाडौं । रसुवा जिल्लाको टिमुरे र स्याप्रुबेँसी आसपासका क्षेत्रमा ठूलो बाढी आएको छ। बाढीको उच्च जोखिमलाई मध्यनजर गर्दै सरकारले सुरक्षा निकाय, जिल्ला प्रशासन कार्यालय, स्थानीय तह तथा विपद् व्यवस्थापन निकायहरूलाई उच्च सतर्कता अपनाउन निर्देशन दिएको छ।
सम्भावित क्षति न्यूनीकरणका लागि उद्धार तथा राहतका सम्पूर्ण संयन्त्रलाई तयारी अवस्थामा राख्न र आवश्यक कदम चाल्न सरकारले सम्बन्धित निकायलाई निर्देशन दिएको छ। रसुवा र नुवाकोटका नदी तटीय तथा जोखिमयुक्त क्षेत्रमा बसोबास गर्ने नागरिकलाई विशेष सतर्कता अपनाउन आग्रह गरिएको छ।
नदी किनार तथा पहिरोको जोखिम भएका स्थानमा नजान र अत्यावश्यकबाहेकका यात्रा नगर्नसमेत सचेत गराइएको छ। स्थानीय प्रशासन तथा आधिकारिक निकायबाट जारी हुने सूचना र चेतावनीको पूर्ण पालना गर्न नागरिकलाई अपिल गरिएको छ।
तिब्बततर्फबाट ठूलो बाढी आएको बताएअनुसार भोटेकोशी नदीमा बाढी आएको हो। भोटेकोशी नदीमा आएको बाढीका कारण रसुवा, नुवाकोट, धादिङ, गोरखा र चितवनका नदी तटीय क्षेत्रका बासिन्दालाई सतर्कता अपनाउन आग्रह गरिएको छ।