जेनजी आन्दोलनका क्रममा पक्राउ परेका आफ्ना आफन्तलाई दसैँअघि नै रिहा गर्नुपर्ने माग गर्दै थुनुवा अभिभावक सङ्घर्ष समितिले सरकारमाथि दबाब बढाएको छ।
समितिले आन्दोलनमा सहभागी भएकै आधारमा मुद्दा खेपिरहेका व्यक्तिहरूको मुद्दा खारेज गरी उनीहरूलाई कारागारबाट मुक्त गर्न माग गरेको छ। माग सम्बोधन नभए तिहार र छठ पर्वपछि थप कडा आन्दोलनका कार्यक्रम अघि बढाउने समितिको चेतावनी छ।
समितिका संयोजक छत्रबहादुर कार्कीले जेनजी आन्दोलनबाट राजनीतिक परिवर्तनको आधार तयार भएको दाबी गर्दै त्यसमा सहभागी युवाहरू नै लामो समयदेखि हिरासतमा रहनु दुःखद भएको बताए। उनका अनुसार आन्दोलनसँग सम्बन्धित ठूलो संख्याका व्यक्तिमाथि मुद्दा चलिरहेको छ भने केही धरौटीमा रिहा भएका छन्।
कार्कीले आन्दोलनमा सहभागी भएकै कारण युवाहरूलाई अपराधीको रूपमा व्यवहार गर्न नहुने धारणा राखे। उनका अनुसार उनीहरूमाथिका मुद्दा पुनरावलोकन गरी आवश्यक कानुनी प्रक्रिया पूरा गरेर रिहाइको वातावरण बनाउनुपर्ने माग समितिको छ।
कार्यक्रममा सहभागी अभिभावकहरूले आफ्ना छोराछोरी तथा आफन्त लामो समयदेखि हिरासतमा रहेको भन्दै उनीहरूको भविष्यप्रति चिन्ता व्यक्त गरे। केही अभिभावकले महिनौँदेखि परिवारका सदस्य हिरासतमा रहेको जानकारी दिँदै तत्काल कानुनी प्रक्रिया अघि बढाउन माग गरेका थिए।
कास्कीका समितिका संयोजक खली थापाले आफू पनि केही समय हिरासतमा बसेर धरौटीमा रिहा भएको बताए। उनले आन्दोलनमा सहभागी भएकै कारण आफूहरूमाथि गम्भीर प्रकृतिका अभियोगसरह व्यवहार भएको भन्दै असन्तुष्टि व्यक्त गरे।
त्यस्तै, कास्कीका विवेक नाल्मीले आफ्नो नाबालक छोरा लामो समयदेखि हिरासतमा रहेको बताएका छन्। उनले युवाहरूको भविष्यमा असर पर्ने गरी लामो समयसम्म हिरासतमा राखिनु उचित नभएको भन्दै सरकारको ध्यानाकर्षण गराए।
काठमाडौँका रामलाल श्रेष्ठले पनि आफ्ना छोरा सुसम श्रेष्ठ लामो समयदेखि थुनामा रहेको जानकारी दिए। अन्य अभिभावकहरूले समेत आफ्ना परिवारका सदस्यहरू महिनौँदेखि हिरासतमा रहेको बताउँदै मुद्दा खारेज र रिहाइको माग दोहोर्याएका छन्।
कार्यक्रममा सहभागी अभिभावकहरूले आन्दोलनका क्रममा पक्राउ परेका व्यक्तिहरूमाथि निष्पक्ष कानुनी प्रक्रिया अपनाउन र उनीहरूको अवस्थाबारे सरकारले स्पष्ट पहल गर्नुपर्ने बताएका थिए।
राष्ट्रिय जेनजी नागरिक अभियानका संयोजक सुनिल सिंहले थुनुवा अभिभावकहरूले उठाएका मागप्रति आफ्नो समर्थन रहने बताए। कार्यक्रममा विभिन्न जिल्लाबाट आएका अभिभावक तथा अभियानमा आबद्ध व्यक्तिहरूले आफ्ना आफन्तको रिहाइका लागि पहल गर्न सरकारसँग आग्रह गरेका थिए।
समितिले आगामी दिनमा सरकारको कदम हेरेर थप कार्यक्रम तय गर्ने जनाएको छ।