काठमाडौंमा लगातार भइरहेको वर्षाका कारण फोहोर व्यवस्थापनमा समेत असर परेको छ। सिस्डोलस्थित ल्याण्डफिल साइटमा वर्षाको पानीसँगै लेदो बग्न थालेपछि केही समयका लागि फोहोर ओसारपसार तथा बिसर्जनको काम प्रभावित भएको काठमाडौं महानगरपालिकाले जनाएको छ।
ल्याण्डफिल साइटको अवस्था सहज नभएसम्म फोहोर व्यवस्थापनको नियमित प्रक्रिया सञ्चालन गर्न कठिन हुने महानगरपालिकाको भनाइ छ। त्यसैले महानगरले केही समयका लागि घर तथा व्यवसायबाट निस्कने फोहोर बाहिर ननिकाल्न सर्वसाधारणलाई आग्रह गरेको छ।
महानगरपालिकाले घर, पसल, व्यवसाय तथा कम्पाउण्डबाट निस्कने फोहोर सडक, चोक, सार्वजनिक स्थान, खोला–नाला वा खुला क्षेत्रमा जथाभावी नफाल्न पनि अनुरोध गरेको छ। यसरी फोहोर फाल्दा वर्षाको समयमा थप समस्या सिर्जना हुन सक्ने महानगरले जनाएको छ।
वर्षाको अवस्था र सिस्डोल ल्याण्डफिल साइटमा देखिएको समस्या सामान्य भएपछि फोहोर संकलन तथा ढुवानी सेवा पुनः नियमित रूपमा सञ्चालन गरिने महानगरपालिकाले जानकारी दिएको छ।