बुटवल । नेपाली कांग्रेस रुपन्देहीको १५औँ महाधिवेशनअन्तर्गत तय भएको क्षेत्रीय निर्वाचन कार्यक्रम वर्षाका कारण परिमार्जन गरिएको छ। जिल्ला निर्वाचन समितिले मौसमको प्रतिकूल अवस्थालाई ध्यानमा राख्दै यसअघि निर्धारण गरिएको कार्यक्रम एक दिन पछाडि सारेको हो।
मौसम पूर्वानुमान महाशाखाले देशका विभिन्न स्थानमा भारी वर्षाको सम्भावना रहेको र त्यसबाट जनजीवन प्रभावित हुन सक्ने सूचना जारी गरेको थियो। सोही अवस्थालाई मध्यनजर गर्दै कांग्रेस केन्द्रीय निर्वाचन समितिको निर्देशन तथा विज्ञप्तिका आधारमा रुपन्देहीको निर्वाचन तालिका परिवर्तन गरिएको जिल्ला निर्वाचन समितिले जनाएको छ।
परिमार्जित कार्यतालिकाअनुसार प्रदेश सभा क्षेत्रीय अधिवेशन असोज ११ गते सञ्चालन हुनेछ। त्यस्तै, प्रतिनिधि सभा क्षेत्रीय अधिवेशन असोज १३ गते गर्ने निर्णय भएको छ।
जिल्ला निर्वाचन समितिका संयोजक अधिवक्ता रामचन्द्र गौतमले जारी गरेको विज्ञप्तिमार्फत नयाँ निर्वाचन तालिकाबारे जानकारी गराइएको हो।
लगातारको वर्षाका कारण उत्पन्न मौसमीय अवस्थालाई ध्यानमा राखेर निर्वाचन कार्यक्रम परिवर्तन गरिएको समितिले जनाएको छ।