काठमाडौं । निरन्तरको वर्षाका कारण काठमाडौंको मुलपानी र भक्तपुरको बोडे जोड्ने मनोहरा खोलास्थित पुल नजिकै जमिन भासिएपछि उक्त पुलबाट हुने आवतजावतमा रोक लगाइएको छ।
पुलसँगै रहेको ग्याविन जालीको भागसमेत क्षति पुगेपछि सुरक्षाका लागि आवागमन बन्द गरिएको जिल्ला प्रहरी परिसर भक्तपुरले जनाएको छ। उक्त पुलबाट काठमाडौंको मुलपानी र भक्तपुरतर्फ नियमित रूपमा मानिस तथा सवारीसाधन आवतजावत गर्दै आएका थिए।
यसैबीच, भक्तपुरको खस्याङ–खुसुङ खोलामा पानीको बहाव बढेपछि डेकुचाबाट चाँगुनारायणतर्फ जाने सडकसमेत प्रभावित भएको छ। खोलाको पानी सडकसम्म आइपुगेपछि सो क्षेत्रमा पनि आवागमनमा समस्या देखिएको छ।
लोकन्थली नजिकैको सागबारी क्षेत्रमा समेत नदीको जलस्तर बढेर अस्थायी टहरासम्म पानी पुगेपछि प्रहरीले त्यहाँ बस्दै आएका स्थानीयलाई सुरक्षित स्थानमा सारेको छ। उनीहरूलाई नजिकै रहेको आदर्श जनप्रेमी माध्यमिक विद्यालयमा अस्थायी रूपमा राखिएको प्रहरीले जनाएको छ।
बालकोट र लोकन्थलीको सीमामा पर्ने सागबारी क्षेत्रमा हनुमन्ते, मनोहरा र गोदावरी खोलाको बहाव एकै ठाउँमा मिसिने भएकाले वर्षाका बेला जोखिम बढ्ने गरेको छ।
देशका विभिन्न भागमा निरन्तर वर्षा भइरहेकाले नदी तथा खोलाको जलस्तर बढ्न सक्ने भन्दै स्थानीय प्रशासन तथा प्रहरीले जोखिमयुक्त क्षेत्रमा सावधानी अपनाउन आग्रह गरेको छ।