प्रतिनिधि सभाको सोमबारको बैठकमा नेकपा (एमाले) का प्रमुख सचेतक ऐनबहादुर महरले पूर्वप्रधानन्यायाधीश चोलेन्द्रशम्शेर जबराको पक्राउप्रति असन्तुष्टि व्यक्त गर्दै सरकारले ‘गुण्डागर्दी शैली’ अपनाएको आरोप लगाएका छन्।
उनले जबरालाई कुनै अभियोगबिना मध्यरातमा पक्राउ गरेर सरकारले लोकतान्त्रिक मूल्य–मान्यता र कानुनी शासनको ठाडो उल्लङ्घन गरेको दाबी गरे।
संसद्मा विशेष समय लिएर बोल्दै प्रमुख सचेतक महरले पूर्वप्रधानन्यायाधीश जबराको गिरफ्तारीलाई ‘राज्य आतंक’को संज्ञा दिए। पछिल्ला घटनाक्रमले सरकारको नियतमाथि प्रश्न उठाएको बताउँदै महरले केपी शर्मा ओलीको गिरफ्तारी र विष्णु पौडेललाई दिइएको सास्तीलाई पनि यसैको निरन्तरता भएको जिकिर गरे।
उनले सरकारले आफूलाई लुई चौधौँझैँ ‘म नै राज्य हुँ’ भन्ने भ्रममा राखेर स्वेच्छाचारी निर्णय गरिरहेको आरोप लगाए। कानुनभन्दा माथि कोही पनि नहुने उल्लेख गर्दै उनले सरकारले पूर्वाग्रह र प्रतिशोधका आधारमा नागरिकको मान–प्रतिष्ठामाथि प्रहार गरिरहेको दाबी गरे।
यदि कसैले कानुन मिचेको भए तथ्य र प्रमाणका आधारमा कारबाही गर्नुपर्ने बताउँदै उनले त्यसको पक्षमा आफूहरू रहेको बताए। तर, आधारहीन आरोपमा घरमै गएर पक्राउ गर्ने शैली कानुनी राज्यको बर्खिलाप भएको उनको भनाइ थियो।
सरकारले सुरक्षा थ्रेटको बहानामा जबरालाई पक्राउ गरेको सन्दर्भमा समेत महरले प्रश्न उठाए। उनले ‘जेन–जी’को नाम जोडेर सरकारले युवा पुस्तालाई समेत बदनाम गर्न खोजेको आरोप लगाए।
थ्रेट दिने समूहलाई संरक्षण गर्ने तर थ्रेट भोग्नेलाई पक्राउ गर्ने सरकारको कार्यशैली विरोधाभासपूर्ण रहेको भन्दै उनले त्यसको निन्दा र भर्त्सना गरे।
सरकारलाई लोकतान्त्रिक विधि र विधिको शासनप्रति प्रतिबद्ध रहन चेतावनी दिँदै महरले यस्ता घटनाले निरंकुशताको झल्को दिने बताए।