काठमाडौँ । राजधानीको ऐतिहासिक टुँडिखेललाई व्यवस्थित, हरियालीयुक्त र नागरिकमैत्री खुला स्थानका रूपमा विकास गर्ने उद्देश्यले भइरहेको सौन्दर्यीकरणको काम अन्तिम चरणमा पुगेको छ।
काठमाडौँ महानगरपालिकाले सैनिक मञ्चको दक्षिणी भागमा विशेष प्रजातिको बरमुढा दुबो रोप्ने कामलाई तीव्र बनाएको छ। दुबो विस्तार भएपछि सुख्खा समयमा धुलो उड्ने तथा वर्षायाममा हिलो हुने समस्या घट्ने अपेक्षा गरिएको छ।
सौन्दर्यीकरणको ठेक्का बेन्जामीन–सुस्मन–आरके जेभीले पाएको हो। निर्माण कम्पनी आरके जेभीका सञ्चालक रविनकुमार गौतमका अनुसार करसहित २ करोड ४२ लाख रुपैयाँ लागतमा भइरहेको काममध्ये करिब ९० प्रतिशत सम्पन्न भइसकेको छ।
गौतमका अनुसार अहिले ५० भन्दा बढी श्रमिक परिचालन गरेर दुबो रोप्ने, मैदान व्यवस्थापन गर्ने तथा आवश्यक पूर्वाधार निर्माणको काम भइरहेको छ।
मैदानमा वर्षभरि हरियाली कायम राख्न चार स्थानमा बोरिङको व्यवस्था गरिएको छ। करिब ६१ हजार २ सय ६३ वर्गमिटर क्षेत्रफलमा फैलिएको टुँडिखेललाई थप व्यवस्थित खुला तथा हरित क्षेत्रका रूपमा विकास गर्ने महानगरको योजना छ।
सौन्दर्यीकरण सम्पन्न भएपछि टुँडिखेलमा सर्वसाधारणका लागि हिँडडुल, व्यायाम, आराम तथा विभिन्न सार्वजनिक गतिविधि सञ्चालन गर्न थप सहज वातावरण बन्ने अपेक्षा गरिएको छ।