काठमाडौं । पर्वतको जलजला गाउँपालिका–७ लामाबगरमा गएको पहिरोले चार वटा घर र दुई वटा गोठ पुरिँदा एक जना घाइते भएका छन्।
पहिरोमा परेका ६५ वर्षीय आत्मराज शर्मालाई सुरक्षाकर्मी, जनप्रतिनिधि र स्थानीयवासीले उद्धार गरेका थिए। उनको म्याग्दीस्थित बेनी अस्पतालमा उपचार भइरहेको छ र अवस्था सुधारोन्मुख रहेको गाउँपालिकाले जनाएको छ।
पहिरोमा चक्रपाणि आचार्य, लिलाधर उपाध्याय, आत्मराज शर्मा र मञ्जुला आचार्यका घर तथा नजिकैका दुई गोठ पुरिएका छन्। गोठमा रहेका दुई भैँसी तथा पाठापाडी पनि पहिरोमा परेको बताइएको छ। घरभित्रका खाद्यान्न, कपडा र अन्य सामग्रीमा समेत क्षति पुगेको छ।
पहिरोका कारण करिब १२ रोपनी खेतीयोग्य जमिन पुरिएको छ। यसअघि मालढुङ्गा–बेनी सडकको माथिल्लो क्षेत्रमा जमिन चिरिएको जानकारी आएपछि जोखिममा रहेका केही स्थानीयलाई सुरक्षित स्थानमा सारिएको थियो।
विस्थापित परिवारका लागि मिलनचोकमा अस्थायी बसोबासको व्यवस्था गरिएको गाउँपालिकाले जनाएको छ।
यसअघि असोज ८ देखि ११ गतेसम्म परेको वर्षापछि कालीगण्डकी नदीमा आएको बाढीले लामाबगरसहित आसपासका क्षेत्रमा ठूलो क्षति पुर्याएको थियो। नदी कटानका कारण खेतीयोग्य जमिनमा समेत क्षति पुगेको छ।
बाढीपहिरोका कारण कालीगण्डकी करिडोरअन्तर्गत बेनी–जोमसोम–कोरला सडकको मालढुङ्गा–बेनी खण्डसमेत प्रभावित भएको छ। केराबारी क्षेत्रको पहिरो हटाउने काम भइरहेको छ भने लामाबगरको पहिरो पन्छाउन बुधबारदेखि डोजर परिचालन गर्ने तयारी गरिएको गाउँपालिकाले जनाएको छ।
जलजला गाउँपालिकाका विभिन्न वडामा पछिल्लो वर्षाका कारण घर, जमिन तथा सडकमा क्षति पुगेको छ। फर्सेमा कालीगण्डकीको कटानबाट ६८ घर प्रभावित भएका छन् भने लामाखेतमा २५ घर डुबानमा परेका छन्। धाइरिङमा २५ परिवार विस्थापित भएका छन् र खानीगाउँका केही घर पनि जोखिममा रहेको बताइएको छ।
बाढी, पहिरो तथा नदी कटानका कारण जोखिममा परेका स्थानीयलाई जिल्ला प्रशासन कार्यालय पर्वत र सम्बन्धित निकायको समन्वयमा सुरक्षित स्थानमा सारिएको छ। क्षतिको विस्तृत विवरण संकलन गर्न जनप्रतिनिधि तथा कर्मचारीलाई प्रभावित क्षेत्रमा परिचालन गरिएको छ।