काठमाडौं । लगातारको बाढी र पहिरोका कारण अवरुद्ध डुम्रे–बेँसीसहर–चामे सडकमा यातायात सञ्चालन गराउन मर्मत तथा पुनःस्थापनाको काम तीव्र पारिएको छ। सडक विभागले आगामी शुक्रबारसम्म सम्पूर्ण सडकखण्ड सञ्चालनमा ल्याउने लक्ष्यसहित काम अघि बढाएको जनाएको छ।
विभागका अनुसार बेँसीसहर–चामे सडकअन्तर्गत रामबजारमा गएको पहिरो हटाइसकिएको छ। पहिरो पन्छाएपछि उक्त स्थानमा सवारी आवागमन पुनः सुरु भएको छ। तिमाङदेखि कोतोसम्म भने विभिन्न स्थानमा खसेका पहिरो हटाउने काम जारी छ।
खोत्रो क्षेत्रमा बाढीले सडकको केही भाग बगाएपछि क्षतिग्रस्त संरचना सुधार्ने काम भइरहेको छ। त्यहाँ ‘ब्याक कटिङ’ गरी सडकको आकार मिलाउने र आवश्यक ठाउँमा टेवा पर्खाल निर्माण गर्ने काम अघि बढाइएको छ। उक्त क्षेत्रमा आज साँझसम्म यातायात सञ्चालन गर्ने तयारी गरिएको विभागले जनाएको छ।
खोत्रो आसपासको चट्टानी भीर हटाउन नेपाली सेनासँग सहकार्य गरेर ब्लास्टिङको कामसमेत भइरहेको छ। सडक खुलाउन आवश्यक पर्ने कडा चट्टान हटाउने काम यसै प्रक्रियामार्फत अघि बढाइएको हो।
फापर खेत क्षेत्रमा स्थानीयको जग्गा हुँदै सडक खुलाउनुपर्ने भएपछि केही समय काम रोकिएको थियो। जग्गा कटिङका लागि क्षतिपूर्ति माग भएपछि उत्पन्न समस्या स्थानीय तह, जिल्ला प्रशासनलगायत सम्बन्धित निकायसँगको समन्वयमा समाधान गरिएको विभागले जनाएको छ।
यता बगरछाप क्षेत्रमा सडकमा जम्मा भएको लेदो र पहिरो हटाउने काम पनि जारी छ। बाढीका कारण काठका पुल बगेका स्थानमा तत्कालका लागि अस्थायी डाइभर्सन निर्माण गरी सवारी सञ्चालन गराउने तयारी गरिएको छ।
सडक विभागका अनुसार आवश्यक मर्मत, पहिरो सफाइ तथा अस्थायी संरचना निर्माणको काम पूरा गरी पर्सिसम्म डुम्रे–बेँसीसहर–चामे सडकलाई पूर्ण रूपमा सञ्चालनमा ल्याउने लक्ष्य राखिएको छ।
सडक पुनः सञ्चालनमा आएपछि बाढी र पहिरोका कारण प्रभावित मनाङ तथा आसपासका क्षेत्रमा आवतजावत र यातायात सेवा सहज हुने अपेक्षा गरिएको छ।