काठमाडौं । दुबईबाट तेल अभिभतर्फ उडेको फ्लाइदुबईको यात्रुवाहक विमानमा बुधबार बिहान सम्भावित सुरक्षा घटनाको संकेत देखिएपछि विमानलाई साउदी अरबतर्फ मोडेर अवतरण गराउने तयारी गरिएको छ।
नागरिक उड्डयनसम्बन्धी एक अधिकारीका अनुसार विमान साउदी अरबमा अवतरणको प्रक्रियामा रहेको छ। विमान सुरक्षित रूपमा जमिनमा नआएसम्म उडानका क्रममा वास्तवमा के भएको थियो भन्नेबारे पूर्ण रूपमा यकिन गर्न नसकिने अधिकारीले बताएका छन्।
रिपोर्टअनुसार विमानले सम्भावित अपहरणको प्रयाससँग सम्बन्धित आपत्कालीन कोड सक्रिय गर्दै डिस्ट्रेस सिग्नल पठाएको थियो। घटनाबारे सुरक्षा निकायले थप अनुसन्धान गरिरहेको जनाइएको छ।
सुरक्षा अधिकारीहरूका अनुसार विमानभित्रको अवस्थाबारे यकिन विवरण प्राप्त भइसकेको छैन। विमान अवतरण भएपछि कार्गो होल्डसहित विमानको सुरक्षा जाँच गरिने र चालक दलका सदस्यहरूसँग आवश्यक सोधपुछ गरिने तयारी छ।
विमानको चालक दलबीच भएको सञ्चारका विषयमा समेत फरक–फरक विवरण सार्वजनिक भएका छन्। त्यसैले घटनाको वास्तविक प्रकृति विमान सुरक्षित रूपमा अवतरण भएपछि मात्र स्पष्ट हुने अपेक्षा गरिएको छ।
सम्भावित सुरक्षा जोखिमलाई ध्यानमा राख्दै इजरायली वायुसेनाले आफ्नो सतर्कता बढाएको बताइएको छ। आवश्यक अवस्थाका लागि लडाकु विमानहरूलाई पनि तयारी अवस्थामा राखिएको जनाइएको छ।
यसैबीच इजरायलका प्रधानमन्त्री बेन्जामिन नेतान्याहुले सुरक्षा अधिकारीहरूसँग उच्चस्तरीय बैठक बोलाएको विवरण सार्वजनिक भएको छ।
विमान अवतरणपछि सुरक्षा जाँच तथा चालक दलसँगको सोधपुछबाट घटनाको वास्तविक कारणबारे थप जानकारी आउने अपेक्षा गरिएको छ।