नेपाली कम्युनिष्ट पार्टी (नेकपा)का सांसद सुरेशकुमार आलेमगरले पूर्वप्रधानन्यायाधीश चोलेन्द्रशम्शेर जबराको पक्राउबारे राष्ट्रिय मानव अधिकार आयोगमा प्रहरी वरिष्ठ उपरीक्षक (एसएसपी) सन्तोष खड्काले दिएको लिखित बयान सार्वजनिक गर्न सरकारसँग माग गर्नुभएको छ।
राष्ट्रिय सभाको बिहीवारको बैठकमा बोल्दै सांसद आलेमगरले पूर्वप्रधानन्यायाधीश जस्तो विशिष्ट व्यक्ति पक्राउ पर्नुको वास्तविकता र कारण थाहा पाउने अधिकार नेपाली जनता र सार्वभौम संसदलाई रहेको स्पष्ट पार्नुभयो।
भाषणका क्रममा उहाँले जबरा स्वयम् पनि निर्दोष वा विवादरहित व्यक्ति भने नरहेको टिप्पणी गर्नुभयो। उहाँका अनुसार जबराले न्यायाधीश रहँदा गरेका कतिपय फैसलाहरू विवादित बनेका थिए भने ठूला मुद्दाहरूमा सफाइ दिएको, अकुत सम्पत्ति कमाएको आरोप लागेको, सर्वोच्चका न्यायाधीशहरूले आन्दोलन तथा नेपाल बार एशोसिएशनले इजलास बहिष्कार गरेको र महाअभियोग प्रस्ताव भोग्नुपरेको इतिहास छ।
यद्यपि, अहिले जबरा एक स्वतन्त्र नागरिक भइसकेको अवस्थामा व्यक्ति विशेषभन्दा पनि यस घटनाले बसाल्ने गलत नजिर र भविष्यमा पार्ने प्रभावप्रति आफ्नो गम्भीर चिन्ता रहेको उहाँले बताउनुभयो। पूर्वप्रधानन्यायाधीशमाथि नै कारण स्पष्ट नपारी यस्तो कदम चालिन्छ भने सर्वसाधारणको अधिकार कसरी सुरक्षित होला भन्दै उहाँले प्रश्न उठाउनुभयो।
कानूनी राज्यको मान्यताविपरीत सरकार नियम र कानून मिचेर अघि बढ्न नहुने भन्दै सांसद आलेमगरले एसएसपी खड्काको लिखित बयान अविलम्ब सार्वजनिक गर्न जोडदार माग गर्नुभयो।