साल्ट ट्रेडिङद्वारा चाडपर्व लक्षित छुट, विक्री केन्द्रहरूमा उपभोक्ताको चाप
दशैं र तिहारलगायतका ठूला चाडपर्वहरूलाई ध्यानमा राख्दै साल्ट ट्रेडिङ कर्पोरेसनले आफ्ना विक्री केन्द्रहरूबाट दैनिक उपभोग्य वस्तुहरूमा विशेष छुट दिन थालेको छ।
सरकारको निर्देशनानुसार केही खाद्यान्नमा तोकिएको छुट दिइएको छ भने अन्य सामग्रीहरूमा कर्पोरेसन स्वयंले मूल्य घटाएर सहुलियत दरमा विक्री गरिरहेको छ। साल्ट ट्रेडिङका सहायक प्रमुख कार्यकारी अधिकृत ब्रजेशकुमार झाका अनुसार अहिले नुनमा प्रतिकिलो २ रुपैयाँ र चिनीमा प्रतिकिलो ५ रुपैयाँ छुट दिइएको छ। छुटपछि उपत्यकामा चिनी प्रतिकिलो १०० रुपैयाँमा उपलब्ध भइरहेको छ। त्यसैगरी, दाल, तेल, चिउरा र मैदामा सरकारको निर्देशनबमोजिम प्रतिकिलो ७ रुपैयाँ छुट कायम गरिएको छ।
सरकारी छुटबाहेक कर्पोरेसनले आफ्ना आउटलेटहरूबाट विक्री हुने चामलमा प्रतिबोरा ५० रुपैयाँसम्म र गेडागुडीमा प्रतिकिलो ५ रुपैयाँसम्म छुट दिएको छ। त्यसैगरी मसला तथा नेसनल ब्रान्डका बिस्कुटलगायतका सामग्रीहरूमा पनि उत्पादक र कर्पोरेसनको तर्फबाट मूल्य घटाएर विक्री भइरहेको झाले जानकारी दिनुभयो।
उपभोक्तालाई सहज र सस्तो मूल्यमा दैनिक उपभोग्य वस्तु उपलब्ध गराउने उद्देश्यले यो सुपथ मूल्य पसल सञ्चालन गरिएको हो। हाल देशका १०० भन्दा बढी स्थानबाट यो सेवा प्रदान भइरहेको छ भने छुटका कारण कर्पोरेसनका विक्री केन्द्रहरूमा ग्राहकको बाक्लो उपस्थिति र राम्रो प्रतिक्रिया देखिन थालेको छ।