प्रजातान्त्रिक गणतन्त्र कङ्गो (डिआरसी) मा जारी घातक इबोला महामारीका कारण मृत्यु हुनेको संख्या चार हजार नाघेको छ। यद्यपि, केही प्रभावित स्वास्थ्य क्षेत्रमा लामो समयदेखि नयाँ संक्रमित नभेटिएकाले संक्रमण फैलावट संकुचित बन्दै गएको त्यहाँका स्वास्थ्य अधिकारीहरूले जनाएका छन्।
राजधानी किन्सासामा आयोजित पत्रकार सम्मेलनमा स्वास्थ्यमन्त्री रोजर काम्बाले महामारी अब प्रान्तीय तहमा भन्दा पनि निश्चित स्वास्थ्य क्षेत्रहरूमा मात्र सीमित हुँदै गएको जानकारी दिएका छन्।
स्वास्थ्य मन्त्रालयद्वारा सार्वजनिक पछिल्लो तथ्यांकअनुसार सातवटा प्रान्तमा पुष्टि भएका कुल ८ हजार ३ सय संक्रमितमध्ये ४ हजार १८ जनाको मृत्यु भइसकेको छ। यस महामारीमा बिरामीको मृत्युदर ४८.४ प्रतिशत पुगेको छ भने २ हजार १ सय ६२ जना उपचारपछि निको भएका छन्।
मन्त्री काम्बाका अनुसार संक्रमण सुरु भएयता सात प्रान्तका ६३ स्वास्थ्य क्षेत्र प्रभावित भएका थिए। तीमध्ये १२ वटा स्वास्थ्य क्षेत्रमा विगत ४२ दिनदेखि र अन्य आठवटा क्षेत्रमा २२ देखि ४२ दिनयता कुनै पनि नयाँ संक्रमण पुष्टि भएको छैन।
स्वास्थ्य क्षेत्रको संख्यात्मक विवरण प्रस्तुत गर्दै काम्बाले परिस्थितिबारे बताउँदै संक्रमण देखिने स्वास्थ्य क्षेत्रहरूको संख्या घटेको बताएका छन्। उनले भनेका छन्, ‘परिस्थिति अझै पनि परिवर्तनशील छ, तर संक्रमण देखिने स्वास्थ्य क्षेत्रहरूको संख्या घटेको छ। त्यसैले अब यो प्रकोप हाम्रो नियन्त्रणभन्दा बाहिर जान सक्दैन भन्ने हाम्रो निष्कर्ष छ।’
स्थानीय स्तरमा केही सुधार देखिए पनि अन्तर्राष्ट्रिय स्तरबाट भने सतर्कता अपनाउन आग्रह गरिएको छ। अन्तर्राष्ट्रिय मानवीय तथा चिकित्सा सहायता संस्था ‘मेदेसाँ साँ फ्रोन्तिएर’ (एमएसएफ/डक्टर्स विदाउट बोर्डर्स) ले रोगको निगरानी र परीक्षण प्रणालीमा देखिएका कमजोरीका कारण वास्तविक क्षति आधिकारिक तथ्यांकभन्दा धेरै बढी हुनसक्ने चेतावनी दिएको छ।
गत मे महिनामा घोषणा गरिएको यो इबोला प्रकोप कङ्गोको इतिहासमै सबैभन्दा ठूलो र घातक साबित भएको छ। विश्वव्यापी रूपमा भने यो सन् २०१४ देखि २०१६ सम्म पश्चिम अफ्रिकामा फैलिएको भयानक महामारीपछिकै दोस्रो ठूलो इबोला संकट हो। स्वास्थ्य अधिकारीहरूले चुनौती बाँकी नै रहे पनि रोकथामका प्रयासहरू सघन बनाइएको जनाएका छन्।
#Ebola #DRC #DemocraticRepublicOfCongo #EbolaOutbreak #PublicHealth #HealthCrisis #GlobalHealth #DiseaseOutbreak #Epidemic #Healthcare #AfricaNews #WorldNews #HealthNews #MedicalCrisis #DiseasePrevention