काठमाडौँ । कानुन, न्याय तथा संसदीय मामिलामन्त्री सोविता गौतमले विपद्मा बेपत्ता भएका व्यक्तिको मृत्यु घोषणा तथा मृत्यु दर्तासम्बन्धी कानुनी व्यवस्था संशोधनको तयारी भइरहेको बताएका छन् ।
सिंहदरबारमा आयोजित हिमालमा जलवायु परिवर्तनको प्रभाव, जलवायु न्याय तथा भोटेकोशी–त्रिशूली विपद्सम्बन्धी संसदीय विशेष समितिको बैठकमा उनले अध्यादेशमार्फत मृत्यु घोषणा र दर्तासम्बन्धी कानुन संशोधन गर्न लागिएको जानकारी दिएका छन् ।
संसद्को नियमित अधिवेशन अन्त्य भएकाले आवश्यक कानुनी व्यवस्था अध्यादेशमार्फत छिटो अघि बढाउने तयारी भइरहेको उनले स्पष्ट पारेका छन् ।
मृत्यु घोषणा र मृत्यु दर्तासम्बन्धी कानुनमा आवश्यक संशोधनका लागि मन्त्रालयले खाका तयार पारिसकेको उल्लेख गर्दै सरकारले अब कानुन निर्माण गर्दा विपद्लाई केन्द्रमा राख्नुपर्ने आवश्यकता उनले औँल्याएका छन् ।
मन्त्री गौतमले भने, ‘मृत्यु घोषणा कसरी गर्ने भन्ने प्रक्रियाबारे विपद् जोखिम न्यूनीकरण तथा व्यवस्थापन प्राधिकरण (एनडीआरआरएमए) मा निरन्तर छलफल गरेर समाधान निकालिएको छ । अब मूल ऐनमै संशोधन गर्नुपर्ने हुन्छ । संसद् अधिवेशन अन्त्य भएकाले छिट्टै नै सरकारले अध्यादेशमार्फत देवानी संहिता, पञ्जीकरण ऐन वा विपद्सम्बन्धी कानुनमा यो व्यवस्था समेटेर नयाँ कानुन बनाउँदैछ । यसको तयारी भइसकेको छ ।’
विपद् व्यवस्थापन बहुआयामिक र विभिन्न मन्त्रालयसँग सम्बन्धित विषय भएकाले मौसम पूर्वानुमान, राहत प्याकेज, उद्योगी–व्यवसायीलाई सहजीकरण तथा विपद्मा अभिभावक गुमाएका बालबालिकाको संरक्षणलगायत विषयमा सम्बन्धित मन्त्रालयहरूसँग समन्वय गरेर आवश्यक कानुन निर्माण भइरहेको उनले बताएका छन् ।