काठमाडौं । त्रिशूली–३ ‘ए’ जलविद्युत् आयोजनाको सुरुङको इनलेट पोर्टल भेटिएको छ। सुरुङसम्म पुग्ने बाटो खुला भएपछि अब उद्धार टोलीलाई भित्र प्रवेश गराउने तयारी भइरहेको छ।
प्राप्त पछिल्लो जानकारीअनुसार इनलेट पोर्टलसम्म उद्धार टोली पुग्न सफल भएको छ। सुरुङभित्र फसेका व्यक्तिहरूको उद्धारका लागि प्रवेशद्वार आसपासको क्षेत्र सुरक्षित बनाउने तथा अवरोध हटाउने काम भइरहेको छ।
उद्धार टोलीले सुरुङभित्र प्रवेश गर्नुअघि आवश्यक तयारी र सुरक्षा जाँच गरिरहेको जनाइएको छ। सुरुङभित्रको अवस्था पहिचान गरी सुरक्षित रूपमा प्रवेश गर्ने र फसेका व्यक्तिहरूको खोजी तथा उद्धार अघि बढाउने तयारी गरिएको हो।
यसअघि बाढीका कारण आयोजनाको सुरुङ क्षेत्रमा ठूलो क्षति पुगेपछि त्यहाँ कार्यरत कर्मचारी, कामदार तथा अन्य व्यक्तिहरू सम्पर्कविहीन भएका थिए। उनीहरूको अवस्थाबारे यकिन जानकारी लिन उद्धार टोलीले सुरुङभित्र प्रवेश गर्ने प्रयास गरिरहेको थियो।
इनलेट पोर्टलसम्म पहुँच स्थापित हुनु उद्धार कार्यका लागि महत्वपूर्ण प्रगति मानिएको छ। अब सुरुङभित्र प्रवेश गरेपछि मात्र त्यहाँ फसेका व्यक्तिहरूको वास्तविक अवस्था र उद्धारको सम्भावनाबारे थप जानकारी प्राप्त हुने अपेक्षा गरिएको छ।