काठमाडौं । महालेखा परीक्षक तोयम रायाले लेखा परीक्षण प्रणाली प्रभावकारी बनाउन पर्याप्त जनशक्ति र कानूनी स्पष्टता आवश्यक रहेको बताएका छन्।
कृषि, सहकारी तथा प्राकृतिक स्रोत समितिको बैठकमा उनले सरकारी निकायमा वित्तीय उत्तरदायित्व वहन गर्ने अधिकारी स्पष्ट नहुँदा बेरुजु फस्र्यौटमा समस्या भएको बताए। विश्वविद्यालयहरूमा रजिस्ट्रार वा उपकुलपति कसले वित्तीय जिम्मेवारी लिने भन्ने विषय कानूनमै स्पष्ट हुनुपर्ने उनको भनाइ छ।
विभिन्न निकायको लेखा परीक्षणको जिम्मेवारी थपिए पनि त्यसअनुसार महालेखा परीक्षकको कार्यालयलाई साधन–स्रोत र जनशक्ति उपलब्ध नभएको उनले बताए। वैदेशिक ऋण तथा अनुदानको शोधभर्ना ढिलाइमा आयोजना प्रमुख र सचिव जिम्मेवार हुने भन्दै कर्मचारीको बारम्बार सरुवाले पनि समस्या निम्त्याएको उनले उल्लेख गरे।
स्थानीय तहमा वित्तीय चेतना बढेको बताउँदै रायाले राज्यको ढुकुटीको संरक्षण र सही सदुपयोगका लागि कानूनी तथा संरचनागत समस्या हटाउनुपर्नेमा जोड दिए।