राष्ट्रिय स्वतन्त्र पार्टीका सांसद दीपकराज बोहराले त्रिशूली–३ ए जलविद्युत् आयोजनाको सुरुङमा फसेका नागरिकको अवस्था र उद्धारको प्रगतिबारे संसद्लाई जानकारी गराउन सरकारको ध्यानाकर्षण गराएका छन् ।
प्रतिनिधि सभाको बिहीवारको बैठकमा बोल्दै उनले यस्तो ध्यानाकर्षण गराएका हुन् । उनले निर्माणाधीन जलविद्युत् आयोजनाको टनेल तथा सुरुङमा फसेका नागरिकको सरकारले उद्धार गर्न सक्ने हो कि होइन भन्दै प्रश्नसमेत गरेका छन् ।
उनले भविष्यमा हिमताल फुटेर आउने बाढीबाट हुने क्षति कम गर्न एआई प्रविधिमार्फत जोखिमयुक्त हिमतालको निगरानी गर्नसमेत सरकारको ध्यानाकर्षण गराएका छन् ।
उनले भने, ‘यो त्रिशूली–३ एमा खोल्न मिल्ने हो कि होइन ? सरकारले सक्ने हो कि होइन ? कसको एफोर्ट लाग्ने हो ? त्यो सुरुङमा मान्छे जीवित छन् कि छैनन् । कसले भनिदिने हो खासमा ? विदेशी कसैको सहयोग चाहिएर कोही आउने हो कि ? सरकारले बताइदिनुपर्यो सभामुख महोदय । यस्ता हिमतालहरू नेपालमा धेरै छन् । आगामी दिनमा यस्ता हिमतालहरू नफुट्नका लागि एआईजडित क्यामेराहरू हुन्छन् । एआई आफैँले रिपोर्ट गर्छ । तालमा वा पहाडमा कुनै हलचल भयो भने सूचना दिने खालका क्यामेरा जडान गर्ने हो कि ?’
उनले बाढी प्रभावित क्षेत्रमा खोज, उद्धार तथा राहत वितरणलाई थप प्रभावकारी बनाउनसमेत सरकारसँग माग गरेका छन् ।