काठमाडौंको भद्रकालीस्थित नेपाल कृषि अनुसन्धान परिषद् (नार्क) परिसरमा सोमबारदेखि ‘जुम्ली स्याउ प्रदर्शनी तथा बिक्री सप्ताह’ सुरु भएको छ।
जुम्लामा उत्पादन हुने अर्गानिक स्याउको प्रवद्र्धन, प्रचार–प्रसार तथा बजार विस्तार गर्ने उद्देश्यले साताव्यापी प्रदर्शनी आयोजना गरिएको हो।
प्रदर्शनीको पहिलो दिन कृषि, वन तथा पर्यावरणमन्त्री गीता चौधरीले प्रदर्शनीस्थलको अवलोकन गरेकी थिइन्। त्यस क्रममा उनले जुम्ली स्याउको गुणस्तर र छुट्टै पहिचानलाई ध्यानमा राख्दै यसको ब्राण्डिङ तथा व्यवस्थित बजार व्यवस्थापनका लागि सरकारले आवश्यक पहल गर्ने बताइन्।
मन्त्री चौधरीले अर्गानिक उत्पादनलाई प्रोत्साहन गर्नु सरकारको प्राथमिकतामा रहेको उल्लेख गर्दै नेपाली स्याउलाई स्वदेशी बजारमा स्थापित गर्न आवश्यक नीतिगत तथा व्यावहारिक कदम चालिने बताइन्।
स्वदेशी उत्पादनको प्रयोग र प्रवद्र्धनले किसानको आर्थिक अवस्थामा सुधार ल्याउन सहयोग पुग्ने उल्लेख गर्दै उनले जुम्ली स्याउजस्ता मौलिक कृषि उत्पादनको संरक्षण र प्रवद्र्धनमा यस्ता प्रदर्शनीले महत्वपूर्ण भूमिका खेल्ने बताइन्।
सात दिनसम्म सञ्चालन हुने प्रदर्शनीमा जुम्लाका विभिन्न बगैँचाबाट ल्याइएका अर्गानिक स्याउ बिक्रीका लागि राखिएका छन्। प्रदर्शनीले जुम्ली स्याउको बजार विस्तारमा सहयोग पुर्याउने र उपभोक्ताले प्रत्यक्ष रूपमा गुणस्तरीय अर्गानिक स्याउ खरिद गर्न पाउने आयोजकको अपेक्षा छ।