काठमाडौं । सत्तारुढ दल राष्ट्रिय स्वतन्त्र पार्टी (रास्वपा)की सांसद डा. तोसिमा कार्कीले राजविराजस्थित गजेन्द्रनारायण सिंह सगरमाथा अस्पताल परिसरबाहिरै एक महिलाले बच्चा जन्माएको घटनाप्रति सरकार र अस्पताल प्रशासनमाथि गम्भीर प्रश्न उठाएकी छन् ।
प्रतिनिधिसभाको शुक्रवारको बैठकमा बोल्दै उनले यस्तो प्रश्न उठाएकी हुन् । उनले प्रसव पीडामा रहेकी महिलालाई तत्काल अस्पतालमा भर्ना गरी सुरक्षित प्रसूतिको व्यवस्था गर्नुपर्नेमा अस्पताल परिसरबाहिरै बच्चा जन्माउनुपर्ने अवस्था आउनुमा अस्पताल प्रशासनको कमजोरी रहेको बताइन् ।
उनले संविधानले स्वास्थ्य, सुरक्षित मातृत्व र प्रजनन स्वास्थ्यको अधिकार सुनिश्चित गरे पनि नागरिकले व्यवहारमा त्यसको अनुभूति गर्न नसकेको भन्दै सरकारको ध्यानाकर्षण गराइन् । उनले अस्पताल प्रशासनले बिरामी अस्पतालबाट कहिले र कसरी बाहिरिइन् भन्नेबारे समेत जानकारी नभएको जवाफ दिएकोप्रति आपत्ति जनाइन् ।
राजविराज नगरपालिका–१४, पर्साही निवासी हरेराम पासवानकी श्रीमती बबिता पासवानलाई सुत्केरी व्यथा लागेपछि अस्पताल लगिएको थियो । तर, उपचारका लागि आवश्यक रकम नभएको भन्दै अस्पतालले उनलाई भर्ना गर्न अस्वीकार गरेको बताइएको छ । पासवानसँग तत्काल २ हजार ५ सय रुपैयाँ मात्र रहेको र सो रकमका कारण अस्पतालले भर्ना लिन अस्वीकार गरेको जनाइएको छ ।
सांसद कार्कीले भनिन्, ‘संविधानमा हामीले स्वास्थ्यको हक लेख्यौँ, सुरक्षित मातृत्व र प्रजनन स्वास्थ्यको हक लेख्यौँ । तर कागजमा लेखिएको निःशुल्क सेवा र नागरिकले पाउने वास्तविक व्यवहारिक सेवामा यति धेरै दूरी किन, सभामुख महोदय ? मेरा केही प्रश्न छन् । प्रसव पीडामा भएकी महिलालाई तत्काल भर्ना गरेर तपाईं कतै नजानुस् है, तपाईंको घर खुलिसकेको छ, तपाईंलाई हामी निरन्तर हेर्छौँ भन्नुपर्ने थियो । त्यो भनियो कि भनिएन ? अनि अस्पतालले हामीलाई जानकारी नै छैन, कुन बेला बिरामी निस्किएर गयो भनेर भन्न पाउँछ ?’
उनले बबिताजस्ता हरेक सुत्केरी र प्रसव पीडामा रहेका महिलासम्म राज्य पुग्नुपर्ने बताइन् ।