काठमाडौं । नेपाली कम्युनिष्ट पार्टी (नेकपा)का प्रमुख सचेतक युवराज दुलालले सरकारले विद्युतीय खरिद प्रणाली (ईजीपी) बन्द गर्न लागेको भन्ने जानकारी आएको भन्दै जवाफ माग गरेका छन् ।
प्रतिनिधिसभाको शुक्रवारको बैठकमा बोल्दै उनले ईजीपी प्रणाली ह्याक भएको भन्दै सरकारले बन्द गर्न लागेको सूचना प्राप्त भएको भन्दै सरकारको ध्यानाकर्षण गराएका हुन् । उनले ह्याक भएको भन्दै बिचौलियाको प्रभावमा सरकारले ईजीपी प्रणाली नै बन्द गरेर नयाँ प्रणाली ल्याउने तयारी गरिरहेको सूचना प्राप्त भएको पनि बताए ।
उनले ईजीपी सिस्टम तत्काल खुलाएर पूर्ण सञ्चालनमा ल्याउन सरकारको ध्यानाकर्षण गराए । उनले ह्याक भएको भए ह्याकिङमा संलग्नहरूलाई छानबिन गरी आवश्यक कारबाही गर्नुपर्ने समेत बताए ।
सांसद दुलालले भने, ‘सुनिएअनुसार सरकारले विद्युतीय खरिद प्रणाली ह्याक भएको भनेर यसलाई बन्द गर्न खोज्दैछ भन्ने कुरा सुनेका छौँ । त्यसकारण सबै सरोकारवालाहरूको तर्फबाट सरकारलाई के आग्रह गर्न चाहन्छु भने ईजीपी सिस्टम तत्काल खुलाइयोस्, पूर्ण सञ्चालनमा ल्याइयोस् । ह्याक भएको भए ह्याकिङमा संलग्नहरूलाई छानबिन गरी आवश्यक कारबाही गरियोस् । कसैलाई पनि उन्मुक्ति नदिइयोस् ।
पुराना कोडहरूले यो सिस्टम चल्दैन भनेर केहीले बिचौलिया तथा कर्मचारीहरू र व्यवसायीहरूको समेत मिलेमतोमा सरकारलाई प्रभावमा पारेर यो ईजीपी सिस्टमलाई नै कोल्याप्स गर्न खोजिँदैछ । र त्यसको ठाउँमा नयाँ ल्याउने तयारी भइरहेको भन्ने कुरा पनि जानकारीमा आएको छ । त्यसो नहोस् । यदि त्यसो भयो भने डिजिटल शासनको कुरा गरेर आएको सरकार, समृद्धि र सुशासन ल्याउँछौँ भनेर आएको सरकार फेरि कागजी युगमा फर्किनुजस्तो विडम्बना केही पनि होइन ।’
डिजिटल शासन र सुशासनको प्रतिबद्धता जनाएको सरकारले ईजीपी हटाएर पुनः कागजी प्रक्रियातर्फ फर्किनु विडम्बना हुने उनको भनाइ छ ।