काठमाडौं । प्रधानमन्त्री बालेन शाहले बाढी तथा अन्य विपद्बाट प्रभावित स्थानीय तहका जनप्रतिनिधिसँग छलफल गरेका छन्। रसुवाको भोटेकोशीमा आएको बाढीपछि विपद् संकटग्रस्त क्षेत्र घोषणा गरिएका जिल्लाका जनप्रतिनिधिलाई सिंहदरबारमा बोलाएर प्रधानमन्त्री शाहले पछिल्लो अवस्थाबारे जानकारी लिएका हुन्।
प्रधानमन्त्री तथा मन्त्रिपरिषद्को कार्यालयमा भएको छलफलमा नुवाकोट, रसुवा, धादिङ, गोरखा र तनहुँका १५ स्थानीय तहका प्रमुख तथा सम्बन्धित प्रतिनिधिसभा सदस्य सहभागी छन्।
बैठकमा बाढी तथा पहिरोपछि प्रभावित क्षेत्रमा देखिएका समस्या, हालको अवस्था, तत्काल चाल्नुपर्ने कदम तथा पुनरुत्थानका योजनाबारे छलफल भइरहेको छ। विपद्पछि स्थानीय तहले सामना गरिरहेका चुनौती र आवश्यक सहयोगबारे समेत जनप्रतिनिधिले प्रधानमन्त्रीलाई जानकारी गराएका छन्।
छलफलमा नुवाकोटबाट प्रतिनिधिसभा सदस्य विक्रम तिमिल्सिना र अच्युतम लामिछाने सहभागी छन्। त्यस्तै विदुर नगरपालिकाका प्रमुख राजन श्रेष्ठ, बेलकोटगढी नगरपालिकाका प्रमुख जगतबहादुर गुरुङ, किस्पाङ गाउँपालिकाका अध्यक्ष विरबल तामाङ र तारकेश्वर गाउँपालिकाका अध्यक्ष शिव अधिकारी सहभागी भएका छन्।
रसुवाबाट उत्तरगया गाउँपालिकाका अध्यक्ष माधवप्रसाद अर्याल, कालिका गाउँपालिकाका अध्यक्ष हरिकृष्ण देवकोटा तथा आमाछोदिङमो गाउँपालिकाका अध्यक्ष बुचुङ तामाङ छलफलमा उपस्थित छन्। गोसाइँकुण्ड गाउँपालिकाका अध्यक्ष कैसाङ नुर्पु तामाङ भने अनलाइन माध्यमबाट बैठकमा जोडिएका छन्।
धादिङका गल्छी गाउँपालिकाका अध्यक्ष केदारनाथ खतिवडा, सिद्धलेक गाउँपालिकाका अध्यक्ष परशुराम खतिवडा, गजुरी गाउँपालिकाका अध्यक्ष गणेशलाल श्रेष्ठ र बेनीघाट रोराङ गाउँपालिकाका अध्यक्ष कृष्णबहादुर थपलिया पनि छलफलमा सहभागी छन्।
त्यसैगरी तनहुँबाट देवघाट गाउँपालिकाका अध्यक्ष तिलबहादुर थापा र आँबुखैरेनी गाउँपालिकाका अध्यक्ष शुक्र चुमान तथा गोरखाको गण्डकी गाउँपालिकाका अध्यक्ष दिपक तिमिल्सिना सहभागी भएका छन्।
विपद्पछि प्रभावित क्षेत्रको पुनर्स्थापना, स्थानीय नागरिकलाई आवश्यक राहत तथा आगामी दिनमा अपनाउनुपर्ने रणनीतिबारे छलफललाई केन्द्रित गरिएको जनाइएको छ।