काठमाडौं । राजनीतिक विश्लेषक भरतमणि दाहालको गिरफ्तारीविरुद्ध सर्वोच्च अदालतमा दायर गरिएको बन्दी प्रत्यक्षीकरणको रिटमाथि सुनुवाइ सुरु भएको छ।
दाहालको रिटमाथि न्यायाधीशद्वय कुमार रेग्मी र सुनिलकुमार पोखरेलको संयुक्त इजलासमा सुनुवाइ भइरहेको छ।
यसअघि सर्वोच्च अदालतले दाहाललाई पक्राउ गर्नुको आधार र कारणसहित लिखित जवाफ पेस गर्न सम्बन्धित प्रहरी निकायलाई आदेश दिएको थियो। अदालतले आदेश प्राप्त भएको मितिले बाटोको म्यादबाहेक २४ घण्टाभित्र अनुसन्धानसम्बन्धी मिसिलसहित दाहाललाई अदालतमा उपस्थित गराउनसमेत भनेको थियो।
अदालतको आदेशअनुसार दाहाललाई आज सर्वोच्चमा उपस्थित गराइएको हो।
मोरङबाट पक्राउ
प्रहरीले दाहाललाई आइतबार मोरङको बेलबारीबाट नियन्त्रणमा लिएको थियो।
प्रहरीका अनुसार आफ्नो युट्युब च्यानलमार्फत भूराजनीतिक विषय तथा उच्च राजनीतिक व्यक्तिहरूसँग सम्बन्धित भ्रामक सामग्री प्रसारण गरेको आरोपमा उनीमाथि अनुसन्धान भइरहेको छ।
दाहालको पक्राउपछि उनको तर्फबाट बन्दी प्रत्यक्षीकरणको रिट दायर गरिएको थियो। उक्त रिटमा अदालतले पक्राउको कानुनी आधार तथा अनुसन्धानको अवस्थाबारे सम्बन्धित निकायसँग जवाफ मागेको थियो।
अब सर्वोच्च अदालतको सुनुवाइबाट दाहालको हिरासतसम्बन्धी विषयमा के आदेश आउँछ भन्नेमा ध्यान केन्द्रित भएको छ।