काठमाडौं–हेटौँडा जोड्ने छोटो मार्गका रूपमा रहेको कान्ति लोकपथ पुनः अवरुद्ध भएको छ ।
ललितपुरको वागमती गाउँपालिका–३ स्थित छपेली क्षेत्रमा खसेको ठूलो पहिरोले सडक यातायात पूर्ण रूपमा ठप्प पारेको हो । कान्ति लोकपथको ६१+४०० देखि ६३+००० किलोमिटर (चेनेज) खण्डमा पर्ने छपेली क्षेत्रमा शुक्रबार बिहान पहिरो खसेको थियो ।
सडक डिभिजन कार्यालयले पहिरो पन्छाएर यातायात सुचारु गर्ने तयारी गरिरहेको समयमा पुनः ठूलो परिमाणमा पहिरो खसेपछि सडक खुलाउने काम प्रभावित बनेको छ । स्थानीय प्रशासनका अनुसार सो क्षेत्रमा पहिरो खस्ने क्रम अझै नरोकिएकाले सडक खुलाउन जोखिम बढेको छ ।
पहिरो सक्रिय रहेकाले तत्कालै सवारीसाधन सञ्चालन गर्न सक्ने अवस्था नरहेको इन्जिनियरहरूले जनाएका छन् । माटो र लेदोसहित खसिरहेको पहिरोका कारण सडक मर्मतमा खटिएका प्राविधिक तथा कामदारहरूलाई समेत काम गर्न कठिनाइ भएको छ ।
हाल सो खण्ड भएर यात्रा गर्ने यात्रुहरूलाई वैकल्पिक मार्गको प्रयोग गर्न प्रशासनले अनुरोध गरेको छ । पहिरोको प्रकृति हेर्दा तत्कालै बाटो खुल्ने सम्भावना न्यून देखिएको छ ।
भौतिक पूर्वाधारको यो महत्वपूर्ण सडकखण्ड वर्षायाममा पटक–पटक पहिरोको चपेटामा पर्दै आएको छ, जसका कारण हेटौँडा–काठमाडौं आउजाउ गर्ने यात्रुहरू सास्ती खेप्न बाध्य छन् ।