चितवन । केही दिनदेखि परेको लगातार वर्षाका कारण बढेको नारायणी नदीको पानीको सतह अहिले घट्न थालेको छ। नदीको जलस्तर करिब साढे चार मिटरले घटेपछि नारायणी क्रमशः सामान्य अवस्थातर्फ फर्किन थालेको हो।
आइतबार नारायणी नदीको जलस्तर ११.९४ मिटर पुगेको थियो, जुन अहिलेसम्मकै उच्च मापन भएको बताइएको छ। त्यसपछि पानीको सतह निरन्तर ओरालो लाग्दै हाल ७.४५६ मिटरमा झरेको छ।
जलस्तरमा आएको उल्लेख्य गिरावटसँगै नदीमा देखिएको उर्लिएको अवस्था पनि कम हुँदै गएको छ। लगातारको वर्षाका कारण उच्च विन्दुमा पुगेको नारायणीको पानी घट्न थालेपछि आसपासका क्षेत्रमा देखिएको बाढीको जोखिमसमेत क्रमशः कम हुँदै गएको छ।
सम्बन्धित निकायले भने नदीको बहाव र जलस्तरमा भइरहेको परिवर्तनलाई निरन्तर निगरानी गरिरहेको जनाएको छ।