काठमाडौँ । काठमाडौं उपत्यका अपराध अनुसन्धान कार्यालयका प्रमुख एसएसपी सन्तोष खड्का राष्ट्रिय मानव अधिकार आयोगको पुल्चोकस्थित कार्यालय पुगेका छन्। पूर्वप्रधानन्यायाधीश चोलेन्द्र शमशेर जबराको पक्राउसँग सम्बन्धित विषयमा जानकारी लिन आयोगले उनलाई बोलाएको हो।
आयोगले सोमबार पत्र पठाउँदै जबराको पक्राउका सम्बन्धमा आवश्यक जानकारी तथा स्पष्टीकरणका लागि एसएसपी खड्कालाई उपस्थित हुन आग्रह गरेको थियो। आयोगको पत्रपछि खड्का मंगलबार कार्यालयमा पुगेका हुन्।
राष्ट्रिय मानव अधिकार आयोगका प्रवक्ता टीकाराम पोखरेलले एसएसपी खड्का आयोगमा उपस्थित भएको पुष्टि गरेका छन्।
पूर्वप्रधानन्यायाधीश जबरालाई शनिबार मध्यरातमा प्रहरीले उनको निवासबाट नियन्त्रणमा लिएको थियो। प्रहरी नियन्त्रणमा करिब १२ घण्टा राखिएपछि उनलाई रिहा गरिएको थियो।
जबराको पक्राउबारे जानकारी लिन आयोगको टोली काठमाडौं उपत्यका अपराध अनुसन्धान कार्यालय, टेकु पुगेको थियो। तर त्यहाँ आयोगका प्रतिनिधिलाई भेटघाट गर्न नदिइएपछि टोली फर्किएको थियो।
त्यसपछि आयोगले पक्राउको प्रक्रिया, प्रहरीको कारबाही तथा घटनासँग सम्बन्धित विषयमा जानकारी लिन एसएसपी खड्कालाई पत्राचार गरेको हो।
आयोगमा भएको छलफलका क्रममा जबराको पक्राउसँग सम्बन्धित घटनाक्रमबारे प्रहरी पक्षको धारणा तथा आवश्यक विवरण लिइने बताइएको छ।